18:01 / 27.04.2021
1362
Навоийда қалбаки пулларни муомалага киритмоқчи бўлган шахслар ушланди  

Навоий вилоятида қалбаки пулга савдо дўконларидан озиқ-овқат маҳсулотларини харид қилган шахслар қўлга олинди. Бу ҳақда Бош прокуратура ҳузуридаги иқтисодий жиноятларга қарши курашиш департаменти хабар берди.

Маълум қилинишича, фуқаро А.И. ва унинг 2 нафар шериги Кармана туманидаги 4 нафар тадбиркорнинг савдо дўконларида озиқ-овқат маҳсулотларини харид қилишган. Улар томонидан сотувчиларга харид учун 4 дона 100 минг сўмлик купюрадаги қалбаки 400 минг сўм берилган. Бош прокуратура ҳузуридаги департамент ҳамда ДХХнинг Навоий вилояти бошқармалари томонидан ўтказилган тезкор тадбирда А.И.нинг ёнида яна 1 дона 100 минг сўмлик ва 8 дона 50 минг сўмлик купюрадаги қалбаки пуллар борлиги аниқланиб, ашёвий далил сифатида олинган.

Экспертиза хулосасида, ушбу қалбаки пуллар компьютер техникаси ёрдамида тайёрланиб, рангли принтерда чоп этилганлиги қайд этилган.

Мазкур ҳолат юзасидан А.И. ва унинг шерикларига Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари ўтказилмоқда.

Top