Surxondaryoda uzoq yillik chinor va archa daraxtlarini kestirgan yo‘l qurilishi mutasaddisiga chora ko‘rildi

Surxondaryo viloyati Denov tumanida ko‘p yillik chinor va archa daraxtlarini kestirgan yo‘l qurilishi mutasaddisiga chora ko‘rilgan. Bu haqda viloyat Ekologiya va atrof-muhitni muhofaza qilish boshqarmasi xabar bermoqda.

Ma'lum qilinishicha, ijtimoiy tarmoqlarda Denov tumanida 50-70 yillik chinorlar kesilayotgani haqida xabarlar tarqalgan. Mazkur xabarlar yuzasidan Surxondaryo viloyati Ekologiya va atrof-muhitni muhofaza qilish boshqarmasi Denov tuman inspeksiyasi inspektorlari tomonidan atroflicha o‘rganish ishlari olib borilgan.

O‘rganish jarayonida Denov tumani Yo‘llardan foydalanish unitar korxonasida ish yurituvchi lavozimida ishlab kelayotgan N.A. tomonidan 2 tup chinor, 2 tup archa daraxti noqonuniy ravishda tag qismi bilan kesishga ruxsat berilgani aniqlangan.

Aniqlangan holat yuzasidan fuqaro N.A.ga nisbatan Ma'muriy javobgarlik to‘g‘risidagi kodeksning 79-moddasi 1-qismi bilan bazaviy hisoblash miqdorining 5 barobari (1 225 000 so‘m) miqdorida ma'muriy jarima solingan. Bundan tashqari o‘simlik dunyosiga 14 577 500 so‘m miqdorida zarar hisoblangan.