Bosh vazir o‘rinbosari Behzod Musayev koronavirusga qarshi emlandi

«Yurtimiz bo‘ylab #men_vaksina_oldim aksiyasi qamrovi tobora kengayib bormoqda. Bugun aksiya doirasida O‘zbekiston Respublikasi Bosh vazir o‘rinbosari Behzod Musayev ham koronavirusga qarshi emlandi. 

Eslatib o‘tamiz, hozirga qadar aksiyasi doirasida hukumat vakillari, hokimlar, oliy o‘quv yurtlari rahbarlari, tibbiyot muassasalari boshliqlari, el  ardog‘idagi san'atkorlar va ko‘plab aholi vakillari koronavirusga qarshi emlandi», deyiladi SSV matbuot xizmati xabarida.

SSV ma'lumotiga ko‘ra, O‘zbekistonda emlash ishlari boshlangandan beri 4,3 milliondan ortiq vaksina qo‘llangan. Kuniga o‘rtacha 130-140 ming doza vaksina qo‘llanmoqda. Shu vaqtgacha 1-bosqichda 2,5 mln, 2-bosqichda 1,3 mln, 3-bosqichda 422 mingdan ortiq kishi emlangan. 

O‘zbekistonda vazirlardan birinchi bo‘lib Maktabgacha ta'lim vaziri Agrippina Shin koronavirusga qarshi emlangani xabar qilingandi, 4 iyun kuni u «Sputnik V» vaksinasi qabul qilgan.

Iyun oyi oxirlarida sobiq sog‘liqni saqlash vazirlari Alisher Shodmonov (hozirda Toshkent tibbiyot akademiyasi rektori) va Anvar Alimov (hozirda sog‘liqni saqlash vazirining o‘rinbosari – Toshkent shahar Sog‘liqni saqlash bosh boshqarmasi boshlig‘i) koronavirus infeksiyasiga qarshi o‘zbek-xitoy vaksinasi bilan emlandi.

2 iyul kuni Xalq ta'limi vaziri Sherzod Shermatov koronavirusga qarshi o‘zbek-xitoy vaksinasi bilan emlandi.

3 iyul kuni O‘zbekiston madaniyat vaziri Ozodbek Nazarbekov Xalqaro press-klubning jonli efirida koronavirusga qarshi vaksina oldi. Tadbirda qatnashganlarga vaksina tanlovi berilgan, vazir «Sputnik V» vaksinasini tanlagan.

Shu kuni Mahalla va oilani qo‘llab-quvvatlash vaziri Rahmat Mamatov ham koronavirusga qarshi vaksina olgani ma'lum bo‘ldi. Qashqadaryo viloyati sog‘liqni saqlash boshqarmasi matbuot xizmatining ma'lum qilishicha, vazir Qashqadaryoga xizmat safari chog‘ida Qarshi shahridagi 4-son oilaviy poliklinikada emlangan, u ham «Sputnik V» vaksinasini qabul qilgan.

Bundan tashqari, 2020 yil oxirida innovatsion rivojlanish vaziri Ibrohim Abdurahmonov xitoy-o‘zbek vaksinasi sinovida ishtirok etgani ma'lum qilingandi.