13:26 / 07.07.2021
13611
Бош вазир ўринбосари Беҳзод Мусаев коронавирусга қарши эмланди

7 июль куни Ўзбекистон бош вазири ўринбосари Беҳзод Мусаев ҳам коронавирусга қарши вакцина қабул қилди.

«Юртимиз бўйлаб #мен_вакцина_олдим акцияси қамрови тобора кенгайиб бормоқда. Бугун акция доирасида Ўзбекистон Республикаси Бош вазир ўринбосари Беҳзод Мусаев ҳам коронавирусга қарши эмланди. 

Эслатиб ўтамиз, ҳозирга қадар акцияси доирасида ҳукумат вакиллари, ҳокимлар, олий ўқув юртлари раҳбарлари, тиббиёт муассасалари бошлиқлари, эл  ардоғидаги санъаткорлар ва кўплаб аҳоли вакиллари коронавирусга қарши эмланди», дейилади ССВ матбуот хизмати хабарида.

ССВ маълумотига кўра, Ўзбекистонда эмлаш ишлари бошлангандан бери 4,3 миллиондан ортиқ вакцина қўлланган. Кунига ўртача 130-140 минг доза вакцина қўлланмоқда. Шу вақтгача 1-босқичда 2,5 млн, 2-босқичда 1,3 млн, 3-босқичда 422 мингдан ортиқ киши эмланган. 

Ўзбекистонда вазирлардан биринчи бўлиб Мактабгача таълим вазири Агриппина Шин коронавирусга қарши эмлангани хабар қилинганди, 4 июнь куни у «Sputnik V» вакцинаси қабул қилган.

Июнь ойи охирларида собиқ соғлиқни сақлаш вазирлари Алишер Шодмонов (ҳозирда Тошкент тиббиёт академияси ректори) ва Анвар Алимов (ҳозирда соғлиқни сақлаш вазирининг ўринбосари – Тошкент шаҳар Соғлиқни сақлаш бош бошқармаси бошлиғи) коронавирус инфекциясига қарши ўзбек-хитой вакцинаси билан эмланди.

2 июль куни Халқ таълими вазири Шерзод Шерматов коронавирусга қарши ўзбек-хитой вакцинаси билан эмланди.

3 июль куни Ўзбекистон маданият вазири Озодбек Назарбеков Халқаро пресс-клубнинг жонли эфирида коронавирусга қарши вакцина олди. Тадбирда қатнашганларга вакцина танлови берилган, вазир «Спутник V» вакцинасини танлаган.

Шу куни Маҳалла ва оилани қўллаб-қувватлаш вазири Раҳмат Маматов ҳам коронавирусга қарши вакцина олгани маълум бўлди. Қашқадарё вилояти соғлиқни сақлаш бошқармаси матбуот хизматининг маълум қилишича, вазир Қашқадарёга хизмат сафари чоғида Қарши шаҳридаги 4-сон оилавий поликлиникада эмланган, у ҳам «Спутник V» вакцинасини қабул қилган.

Бундан ташқари, 2020 йил охирида инновацион ривожланиш вазири Иброҳим Абдураҳмонов хитой-ўзбек вакцинаси синовида иштирок этгани маълум қилинганди.

Мавзу
Коронавирус Ўзбекистонда
15 март куни Ўзбекистонда коронавирусга чалинган илк бемор аниқланди.
Барчаси
Top