Viloyatlardagi radarlar haqidagi ma'lumotlar ochiqlandi. Ammo hammasi emas

Rasmiy axborotga ko‘ra, Qoraqalpog‘iston Respublikasida o‘rnatilgan statsionar fotoradarlar soni 6tani, intellektual rejimida ishlovchi kameralar soni 10tani tashkil etmoqda.

Shuningdek, Buxoroda 8ta radar va 32ta kamera; Qashqadaryoda 1ta radar va 6ta kamera; Navoiyda 8ta radar va 12ta kamera; Toshkent viloyatida 29ta radar va 37ta kamera; Farg‘onada 5ta radar va 21ta kamera; Samarqandda 12ta radar va 6ta kamera; Toshkent shahrida 28ta radar va 89ta kamera ishlayotgani ma'lum qilindi.

Biroq, YHXBB ma'lumotida ayrim viloyatlarda faqat statsionar fotoradarlar haqida ma'lumot berilgan bo‘lsa, ayrim viloyatlar bo‘yicha faqat kameralar soni keltirilgan.

Jumladan, Jizzaxda 15ta, Surxondaryoda 4ta, Sirdaryoda 11ta statsionar fotoradar mavjud ekani aytilgan, biroq ushbu viloyatlardagi kameralar haqidagi ma'lumot yo‘q.

Xorazm, Andijon va Namangan viloyatlari bo‘yicha esa faqat kamera haqida ma'lumotlar mavjud. Jumladan, Xorazmda 16ta, Andijonda 82ta, Namanganda 38ta kamera mavjudligi ma'lum qilingan.

Aytish joiz, yuqoridagi ma'lumotda jami 127ta statsionar fotoradar haqidagi tafsilotlar ochiqlangan. Biroq respublikadagi jami fotoradarlar soni bundan ancha ko‘proqligi tayin. Zero, bundan bir necha kun avval YHXBB boshlig‘i o‘rinbosari Erali Bozorov bugungi kunda tizimda 271ta fotoradar moslamasi borligi, ularning hammasi onlayn tarzda markazga bog‘langanini ma'lum qilgandi.

Kun.uz bu mavhumliklar bo‘yicha YHXBB axborot xizmati bilan bog‘landi. Axborot xizmati vakili Azizxon Murodov holatga oydinlik kiritilib, qo‘shimcha ma'lumot berilishini ma'lum qildi.

Avvalroq, ochiqlik haqidagi prezident farmoni ijrosi doirasida Toshkent yo‘llaridagi fotoradar va kameralar ro‘yxati e'lon qilingandi.