O‘zbekistonda maktablar «Zamonaviy maktab» mezonlari asosida baholanadi

Unga ko‘ra, prezident qarori bilan, O‘zbekistonda Ofsted va Jahon banki ekspertlari hamda Ta'lim sifatini nazorat qilish davlat inspeksiyasi «Zamonaviy maktab»larga qo‘yilgan talablar, baholash tartibi hamda baholash metodikasini ishlab chiqdi.

«Zamonaviy maktab»larni baholash bo‘yicha 11 ta yo‘nalish, 38 ta mezon va 150 ta ko‘rsatkichlar quyidagi 4 ta asosiy soha bo‘yicha amalga oshirilgan:

– ta'lim va tarbiya jarayoni (umumiy ballning 30 foizi);

– umumta'lim muassasasini boshqarish (umumiy ballning 20 foizi);

– malakali mutaxassislar bilan ta'minlanganligi (umumiy ballning 20 foizi);

– moddiy-texnik bazasi va infrastrukturasi (umumiy ballning 30 foizi);

Tajriba-sinov tariqasida 42 ta (har bir hududdan 3 tadan) maktab «Zamonaviy maktab»larga qo‘yiladigan talablar asosida baholandi.

Natijada ushbu 42 ta maktabdan 8 ta (19 foiz) maktab «Zamonaviy maktab» maqomiga ega bo‘ldi, 34 tasi (81 foizi) esa ushbu mezonlarga to‘liq javob bermagani aniqlandi.

«Zamonaviy maktab» maqomiga erishgan maktablar va ularning natijalari quyidagicha:

- 1 ta maktab – «2-darajali «Zamonaviy maktab» maqomi;

- 7 ta maktab – «3-darajali «Zamonaviy maktab» maqomi.

Baholash natijasida har bir maktabga 38 ta mezon bo‘yicha ko‘rsatkichlarni yaxshilash bo‘yicha tavsiyalar beriladi va «Zamonaviy maktab» darajasiga olib chiqish bo‘yicha manzilli chora-tadbirlar belgilanadi.

Ma'lumot uchun, yil yakuniga qadar respublika bo‘ylab 750 ta umumta'lim maktablari «Zamonaviy maktab»lar mezonlari asosida baholanishi rejalashtirilgan.