Toliblar Afg‘onistondagi yana bir viloyat markazini egalladi

“Tolibon” harakati jangarilari Afg‘oniston shimolidagi Saripul viloyati markazi bo‘lgan Saripul shahrini egalladi. Bu haqda viloyat rasmiylariga tayanib Associated Press xabar berdi.

Shahar uchun ikki hafta davomida jang olib borilgan. Natijada afg‘on xavfsizlik kuchlari Saripulni tark etgan, mahalliy qarshilik kuchlari toliblarga jangsiz taslim bo‘lgan.

Endilikda toliblar butun Saripul viloyatini nazorat qilmoqda.

“Tolibon” harakati avvalroq Zaranj (Nimro‘z viloyati markazi), Shibirg‘on (Juzjon viloyati markazi) va Tolukon (Tohar viloyati markazi) shaharlarini qo‘lga kiritgandi.

Bundan tashqari, toliblar Kunduz viloyati markazi, strategik jihatdan muhim ahamiyatga ega bo‘lgan Kunduz shahrini egallagan.