Naked Science nashrining yozishicha, ogʻir yuk koʻtaruvchi dron 5-raqamli tayanch minora tepasidan havoga koʻtarilib, diametri 2,5 millimetr va uzunligi 1 700 metr boʻlgan trosni olib oʻtgan. Tros yuqori mustahkamlikka ega Dyneema tolasidan tayyorlangan.
Dron kemalar serqatnov boʻgʻozni 10 daqiqada kesib oʻtib, trosni 4-raqamli tayanch minoradagi belgilangan nuqtaga yetkazgan. Shu tariqa Sezi va Szintan orollari sohillaridagi ikki asosiy tayanch oʻzaro bogʻlangan.
Bu ishlar koʻprik qurilishi uchun zarur boʻlgan osma ish yoʻlakchasini oʻrnatishga kirishish imkonini beradi. Keyinchalik mazkur yoʻlakcha orqali koʻprikning yuqori konstruksiyalarini montaj qilish ishlari olib boriladi.
Asosiy oraliq - 1 488 metr
Sixoumen koʻprigining asosiy qismi vantali va osma konstruksiyalarni birlashtirgan usulda quriladi. Asosiy oraliq uzunligi 1 488 metr, koʻprik qatnov qismining kengligi esa 68 metr boʻladi.
Manbaga koʻra, qurilish yakunlangach, u dengiz ustidan oʻtkazilgan dunyodagi eng keng koʻprik boʻlishi kutilmoqda. Shuningdek, inshoot vantali va osma tizimlar uygʻunlashtirilgan koʻpriklar orasida ham rekord oʻrnatishi rejalashtirilgan.
Loyiha temiryoʻl-avtomobil koʻpriklari orasidagi eng katta asosiy oraliq, eng katta kenglik va eng baland asosiy tayanch minoralar kabi koʻrsatkichlar boʻyicha jahon rekordlariga daʼvogar. Qoyaga mahkamlanadigan anker tizimi va burgʻilab quyiladigan qoziqlar asosidagi poydevor oʻlchamlari ham rekord darajada boʻlishi koʻzda tutilgan.
Nega dron tanlangan?
Yoʻnaltiruvchi tros keyingi tortish arqonlari va montaj elementlarini koʻprik oraligʻidan oʻtkazish uchun xizmat qiladi. Bunday ishlarda vertolyot, kema yoki dronlardan foydalanish mumkin.
Sixoumen akvatoriyasida kuchli shamol, baland toʻlqinlar va intensiv kema qatnovi qurilishni murakkablashtiradi. Shu sababli Ningbo-Zhoushan Railway va China Railway Major Bridge Engineering Group mutaxassislari turli usullarni taqqoslab, drondan foydalanishni tanlagan.
Bu usul tayyorgarlik va havodagi ishlar vaqtini qisqartirib, xalqaro kema qatnovi yoʻlida harakatni cheklash muddatini kamaytirish imkonini bergan.
