Qashqadaryoda Toshkentga olib ketilayotgan 200 kilogramm noma'lum hayvon go‘shti to‘xtatib qolindi

Qashqadaryo viloyati Chiroqchi tumanida joylashgan «Umakay» muntazam YPX maskanida Toshkent shahriga olib ketilayotgan 200 kilogramm noma'lum hayvon go‘shti to‘xtatib qolingan. Bu haqda viloyat IIB axborot xizmati xabar bermoqda.

Ma'lum qilinishicha, 2021 yil 8 sentabr kuni soat 2:20larda Qashqadaryo viloyati IIB PPX va JTSB Karantin bo‘linmasi hamda YHXB xodimlari hamkorlikda, Chiroqchi tuman hududida joylashgan «Umakay» muntazam YPX maskanida Qashqadaryo-Toshkent yo‘nalishida harakatlanib kelgan, Shahrisabz tumanida yashovchi fuqaro N.Ochilov boshqaruvida bo‘lgan «Lasetti» mashinasi to‘xtatgan.

Mashina tegishli tartibda tekshirilib, yukxonasi ko‘zdan kechirilganda, u yerda hech qanday veterinariya ma'lumotnomasi bo‘lmagan, 4 dona sellofan paketlarda jami 200 kilogramm og‘irlikdagi kelib chiqishi noma'lum bo‘lgan hayvonning lahm go‘shtlari borligi aniqlangan.

Qayd etilishicha, mazkur go‘shtdan Qashqadaryo viloyat Chiroqchi tuman oziq-ovqat mahsulotlari xavfsizligi mikrobiologiya va veterinariya-sanitariya ekspertiza laboratoriyasi tomonidan namunalar olinib tekshirilganda, ularning iste'molga yaroqsiz ekani aniqlanib, tegishli tartibda yo‘q qilingan.