Ispaniya bosh vaziri Pedro Sanches parlamentni tarqatib yubordi va navbatdan tashqari saylovlar oʻtkazilishini eʼlon qildi. Oʻtgan haftada uning hukumati uy-joy inqiroziga qarshi choralar boʻyicha ovoz berish jarayonida magʻlubiyatga uchragandi. Soʻnggi hafta davomida bu inqiroz mamlakat siyosiy hayotidagi asosiy mavzuga aylandi.
Oʻng qanotdagi partiyalar hukumatning qimmat uy-joylarga qarshi chora-tadbirlarini blokladi. Parlamentda 2-oktabr kuni boʻlib oʻtgan ovoz berish jarayonida hukumatning ijarada yashovchilarni himoya qilishga qaratilgan ikkita favqulodda dekreti ovozga qoʻyildi. Ushbu hujjatlarda 2030-yilgacha koʻchirishlarga moratoriy eʼlon qilish, shuningdek, uy-joylarni qisqa muddatli ijaraga berishga hamda xonalarni alohida ijaraga berishga cheklovlar joriy etish taklif qilingandi. Konservativ Xalq partiyasi, ultraoʻng Vox hamda katalonlarning Junts partiyasi bunga qarshi chiqdi. Xalq partiyasi oʻz pozitsiyasini izohlab, uy-joy bilan taʼminlash muammosini cheklovlar joriy etish emas, balki yangi qurilishlar orqali hal qilish kerakligini taʼkidladi.
Parlamentdagi ovoz berish jarayoni mamlakat boʻylab 87 yoshli Marikarmen Abaskal himoyasi uchun boʻlib oʻtgan namoyishlar ortidan oʻtkazildi. Ushbu ayol oʻz kvartirasini taxminan 70 yil muqaddam ijaraga olgan, 2018-yilda esa uning kvartirasi joylashgan koʻchmas mulkni Urbagestión nomli investitsiya kompaniyasi sotib olgan va ijara narxini bir necha baravarga oshirgan, bu narx esa ijarachining pensiya pulidan koʻproq edi va u eski narxda (500 yevro) toʻlashda davom etgan. Kompaniya uch marta uni kvartiradan haydab chiqarishga uringan, ammo sud bu qarorni bloklagan. Toʻrtinchi urinishda esa ayol zambilga solingan holda uydan kuch bilan olib chiqilgan, shundan keyin u shifoxonaga tushib qolgan. Keksa yoshli ayol kvartirasidan majburan chiqarib yuborilayotgani aks etgan kadrlar jamoatchilikda katta shov-shuvga koʻtardi. Madridda boshlangan namoyishlardan keyin ayolga ushbu kvartirada yashashda davom etishga ruxsat berildi.
Vaziyat bu bilan tinchimadi va yuqori ijara narxlariga qarshi aksiyalar boshqa shaharlarga ham tarqalib, soʻnggi vaqtlardagi eng yirik norozilik namoyishlariga aylandi. 3-oktabr kuni 50 ga yaqin shaharda namoyishlar boʻlib oʻtgan, tashkilotchilarga koʻra, ularda 500 mingga yaqin kishi qatnashgan. Birgina Madridning oʻzida 70 ming kishi koʻchalarga chiqqan.
