Homiladorlikni rejalashtirishdan 3 oy avval koronavirusga qarshi emlanish zarur - SSV

Qayd etilishicha, joriy yilning yanvar oyidan to bugungi kungacha Zangiota 1-son yuqumli kasalliklar shifoxonasida 360 nafar chaqaloq dunyoga kelgan.

“Ayni paytda bu yerda tug‘ilib, muolaja olayotgan 17 nafaridan tashqari, qolganlarining hammasi o‘z xonadonlarida sog‘lom ulg‘ayishmoqda. Shuningdek, bu yerda davolangan 2379 ayolning xastalikdan to‘liq xalos bo‘lib oilasi bag‘riga sog‘-omon qaytgani quvonarli holat aslida”, – deyiladi vazirlik xabarida.

Bo‘lim mudiri Bahodir Allayarovning ma'lum qilishicha, shifoxonaning homiladorlar patologiyasi bo‘limi 80 o‘ringa mo‘ljallangan bo‘lib, koronavirus infeksiyasiga chalingan homilador bemorlarning tuzalish muddati o‘rtacha 10-12 kunni tashkil etadi. Homiladorlikda COVID-19ga chalinish onada qon quyuqlashishi jarayonini yanada kuchaytirib yuborishi bilan xavfli hisoblanadi.

“Ammo jonlantirish bo‘limida o‘ta og‘ir ahvoldagi opa-singillarimiz ham bor. Masalan, farg‘onalik A.Sodiqova homiladorlikning katta muddatida kasalxonaga 70 foiz o‘pka zararlanishi bilan yotqizilgan. Bu orada bemorning qil ustida turgan hayotini saqlab qolish uchun homilasini olib tashlashga to‘g‘ri kelgan. Davomli muolajalardan so‘ng ayni kunda uning ahvoli o‘rta og‘ir darajada.

Toshkent viloyatilik D.O‘rinboyeva ham shunday qismat egasi. O‘pkasi 90 foiz zararlangan bemor homilasidan ayrilganidan tashqari, tomog‘iga joylangan naycha orqali nafas olishga majbur”, – dedi bo‘lim boshlig‘i.

Ta'kidlanishicha, bunday bemorlar o‘z vaqtida karantin qoidalariga yetarlicha e'tibor qilishmagan va vaksina olgach farzand ko‘rish rejalashtirilmagan. Shifoxona direktori o‘rinbosari Hilola Alimova homiladorlikni rejalashtirishdan 3 oy avval koronavirusga qarshi emlanish zarurligini ta'kidladi.

“Homilador ayollar ichida ham koronavirusga chalinish holatlari kam emas, aksariyati xastalikni pnevmoniya bilan, ba'zilari reanimatsion holatda o‘tkazyapti. COVID-19ga chalingan ayollarda ko‘pincha muddatdan oldin tug‘dirish amaliyotini bajarishga to‘g‘ri keladi. Chunki onaning ham, bolaning ham hayotini saqlab qolishga harakat qilyapmiz. Shu bois turmush qurishdan, homiladorlikni rejalashtirishdan avval vaksina olish eng to‘g‘ri yo‘l deb hisoblaymiz. Emlangach esa uch oydan so‘ng homilador bo‘lish mumkin. Bu onalar va bolalar sog‘ligi xafv ostida qolmasligi uchun asos bo‘ladi”, – dedi direktor o‘rinbosari.

Eslatib o‘tamiz, 7 oktyabrda Zangiota 1-son va 2-son yuqumli kasalliklar shifoxonalarida faqat Toshkent shahri va viloyatidan 1 ming 600 nafar bemor bolalar davolanayotgani haqida xabar berilgan edi.