16:11 / 25.01.2022
8560
«Барчаси назорат остида, ваҳима учун сабаб йўқ». Зеленский — Украина шарқидаги вазият ҳақида
Фото: Telegram / Зеленский

Украина президенти Владимир Зеленский Миллий хавфсизлик ва мудофаа кенгаши йиғилишидан кейин қилган видеомурожаатида  мамлакат шарқидаги вазият ваҳимага тушиш учун асос бўлмаслиги ҳақида гапирди.

«Барчаси назорат остида. Ваҳимага ўрин йўқ», деган Зеленский.

У ҳукумат вазиятни барқарорлаштириш учун «ҳамкорлар, дипломатлар ва ҳарбийлар» билан биргаликда иш олиб борилаётганини маълум қилган.

«Биз вазиятни тинч йўл билан тартибга солиш орқали кескинликни тўлиқ юмшатиш устида ишлаяпмиз. Барчасидан хабардор бўлган ҳолда ҳаммасига тайёрмиз, биз энг яхшисига ишонамиз ҳамда шерикларимиз, дипломатларимиз ва ҳарбийларимиз билан биргаликда зарур барча нарсани қиляпмиз. [Ҳарбийлар] бизни ҳимоя қиляпти, биз эса уларни ҳимоя қилишимиз, «ҳамма йўқолиб қолди» деб бақирмасдан, хотиржамликни сақлашимиз керак», дейди Украина президенти.

Сўнгги ҳафталарда Ғарб мамлакатлари Россия яқин вақт ичида Украинага бостириб кириши мумкинлиги борасида хавотирлар билдирмоқд. Бу хабарлар фонида НАТО Шарқий Европага қўшимча куч ташлашга киришди, айрим давлатлар Киевдан дипломатлари эвакуациясини бошлади.

Тан олинмаган ДХР раҳбари Денис Пушилин 24 январь куни Украина айирмачиларнинг позицияларига ҳужум қилишга тайёрланаётгани ҳақида айтди. Аввалроқ Вашингтондагилар Москва босқинни «украин етакчилари ўртасида жангарилик кайфияти кучайгани» билан оқлаши мумкинлиги ҳақида айтганди.

Москвадагилар босқинга тайёргарлик кўраётгани ҳақидаги гапларни қатъиян рад этиб келади.

Мавзу
Украина инқирози
2021 йил давомида Россия Украина билан чегарада қўшин тўплади. Сўнгги вақтларда минтақада вазият кескинлашмоқда.
Барчаси
Top