Respublika bo‘yicha elektr energiyasi ta’minoti soat 16:00 gacha to‘liq tiklanadi – Energetika vazirligi

Vazirlik 27 yanvar soat 14:00 holatiga ko‘ra, respublika hududlarida elektr energiyasi ta’minoti bilan bog‘liq holat yuzasidan ma’lumot berdi. Unga ko‘ra, Qoraqalpog‘iston Respublikasi, Buxoro, Jizzax, Qashqadaryo, Surxondaryo, Navoiy, Samarqand, Sirdaryo, Xorazm, Toshkent viloyatlari va Toshkent shahrida 100 foiz, Namangan va Farg‘ona viloyatlarida 91 foiz, Andijon viloyatida esa 89 foiz elektr energiyasi ta’minoti tiklangan.

Avvalroq O‘zbekistonning faqat 4 hududi elektr ta’minoti bilan 100 foiz ta’minlangani, umumtizimda yuzaga kelgan nosozliklar sababli mamlakatimizdagi mavjud gaz qazib olish konlari va uni qayta ishlash zavodlarida texnologik jarayonlarning buzilish holatlari kuzatilayotgani, bu esa gaz ishlab chiqarish hajmining kamayishiga olib kelayotgani, natijada issiqlik elektr stansiyalarida gaz bosimi kamayib, elektr energiyasi ishlab chiqarish hajmiga salbiy ta’sir ko‘rsatayotgani aytilgandi.

Energetika vazirligi 26 yanvar kun avvalida respublikaning 8 hududida — Toshkent shahri, Qoraqalpog‘iston Respublikasi, Xorazm, Buxoro, Navoiy, Samarqand, Jizzax va Farg‘ona viloyatlarida elektr ta’minoti to‘liq tiklanganini ma’lum qilingandi. Soat 22:00 da bergan ma’lumotida esa Buxoro, Navoiy, Samarqand va Farg‘onada ta’minot to‘liq tiklanmagani, faqat Toshkent shahri, Qoraqalpog‘iston, Xorazm va Jizzaxda ko‘rsatkich 100 foiz ekani ma’lum qilindi. Lekin Kun.uz ma’lumotiga ko‘ra, Jizzax viloyatining ayrim hududlarida kun davomida svet bo‘lmagan.