3 fevral kuni haydovchilik guvohnomasini olish uchun imtihon topshirish bo‘yicha Toshkent imtihon markazi taqdimoti bo‘lib o‘tdi.
Yangihayot tumanida joylashgan mazkur xususiy markaz – haydovchilik guvohnomasini olish bo‘yicha imtihon o‘tkaziladigan O‘zbekistondagi ilk avtomatlashtirilgan imtihon kompleksi hisoblanadi.
Ochilish marosimida qayd etilishicha, avtomatlashtirilgan imtihon markazida sinovlar inson omilisiz, korrupsiyadan xoli bo‘ladi, faqat o‘qib tayyorgarlik ko‘rganlargina haydovchilik guvohnomasini ola oladi.
Imtihon qanday tashkillashtiriladi?
Imtihon topshirish uchun kelgan nomzod ro‘yxatdan o‘tgach kassaga boradi va dastlab nazariy imtihon uchun to‘lov qiladi.
To‘lov qilgach, fuqaro kirish qismida QR-kodli beyjigini tekshirtiradi. Kod orqali ro‘yxatga olingani, hujjatlari to‘liqligi va to‘lov qilgani tekshiriladi. Nazariy imtihon xonalari 3ta, har bir xonada 25 kishidan, jami 75 kishi imtihon topshirishi mumkin.
Nazariy imtihonni birinchi urinishda topshira olmagan nomzod yana 7 kundan so‘ng qayta imtihon topshirishi mumkin.
Imtihonni topshirib bo‘lgan nomzod qaytadan to‘lov qilib, amaliy imtihon o‘tkaziladigan qismga boradi. Imtihon oldi nomzodlar amaliy imtihon jarayonini maxsus ekranlar orqali kuzatishi, sinovlar qanday tartibda o‘tishi haqida vizual ma’lumot olishi mumkin.
Bundan tashqari, amaliy mashg‘ulotlarni nazorat qilish maskani mavjud bo‘lib, unda sinovlarda inson omili ishtirok etmasligi, nomzodning qay tartibda imtihon topshirayotgani nazorat qilinadi.
