Senatorlar yoshlarni internetda zararli axborotdan himoya qilish yuzasidan hukumatga parlament so‘rovi yuboradi

Ushbu qaror senatorlarning 23-yalpi majlisida qabul qilindi. Izohlanishicha, internet orqali tarqatilayotgan g‘arazli ma’lumotlar, turli buzg‘unchi g‘oyalar, odob-axloqni yemiruvchi illatlar aholini tashvishga solmoqda.

“.UZ” domenidagi veb-saytlarda milliy mentalitetimizga yot bo‘lgan, fuqarolarning, shu jumladan yoshlarning ongi, ruhiyati, ma’naviy-ma’rifiy tarbiyasiga salbiy ta’sir ko‘rsatadigan, axloqsizlik, behayolik, pornografiya, shafqatsizlik, zo‘ravonlik, qimor hamda tavakkalchilikka asoslangan o‘yinlar targ‘ibotiga xizmat qilishi mumkin bo‘lgan materiallar yoki boshqa veb-resurslarga havolalar joylashtirish (foydalanuvchilar tomonidan) kuzatilmoqda”, deyiladi ma’lumotda.

Bildirilishicha, keyingi vaqtlarda “ommaviy madaniyat” niqobi ostida yoshlar ongiga salbiy ta’sir etuvchi axloqiy buzuqlik va zo‘ravonlik g‘oyalarini tarqatish, turfa yo‘llar bilan qonunchilikka zid ravishda boylik orttirishni, milliy-ma’naviy madaniyatga amal qilmaslikni, ularni o‘zgartirish va ayrim hollarda yo‘qotishni targ‘ib qiluvchi harakatlar uyushtirilmoqda.

“Shu bois, o‘quvchi yoshlarning ongiga zarar yetkazishi mumkin bo‘lgan axloqsizlikni targ‘ib qiluvchi kontentlar, diniy adovatni qo‘zg‘atuvchi, tavakkalchilikka asoslangan onlayn o‘yinlar, totalizatorlar, oilaviy qadriyatlarni inkor etadigan hamda jamiyatda buzg‘unchilik g‘oyalarini targ‘ib etadigan veb-resurslarga qarshi kurashish birgalikdagi ustuvor vazifa ekanligi ta’kidlandi”, deyiladi Senat xabarida.

Majlisda senatorlar internetda yoshlar va voyaga yetmaganlar uchun milliy kontentni rivojlantirish, ularning ijtimoiy tarmoqlardan foydalanishi va zararli axborotdan himoya qilish to‘g‘risida Vazirlar Mahkamasiga parlament so‘rovi yuborish to‘g‘risida qaror qabul qildi.

Eslatib o‘tamiz, avvalroq “Milliy tiklanish” va “Adolat” partiyalari O‘zbekistonda TikTok ijtimoiy tarmog‘ini butunlay bloklashni taklif qilgan edi.

2022 yilgi davlat dasturiga binoan, yil oxirigacha O‘zbekistonda milliy ijtimoiy tarmoq va messenjerlar yaratiladi, ularga to‘plagan auditoriyasiga qarab soliq imtiyozlari beriladi.