Sirdaryoda yo‘lovchi avtobusi YTHga uchradi

IIV YHXBBning xabar berishicha, 2022 yil 14 mart kuni soat 14:30 larda, M-34 Toshkent-Dushanbe xalqaro avtomobil yo‘lining  Sirdaryo tumani hududidan o‘tuvchi 92-kilometrida yo‘lovchi avtobus yo‘l-transport hodisasiga uchragan.

1990 yilda tug‘ilgan haydovchi J.R. «Golden Dragon» rusumli avtobusda harakatlanayotib, rul boshqaruvini yo‘qotgan va qarama-qarshi yo‘nalishni ajratib turuvchi to‘siqqa urilgan. Oqibatda avtobus yo‘lni ajratib turuvchi metal to‘siqning ustiga chiqib ketgan.

Qayd etilishicha, avtobusda haydovchi va bir nafar yo‘lovchi bo‘lgan. Shu sababli hodisada hech kim tan jarohati olmagan, halok bo‘lmagan.

«Ushbu YTH yuzasidan Sirdaryo tumani IIB YHXB xodimlari tomonidan surishtiruv harakatlari olib borilmoqda. Barcha haydovchilardan ob-havo sharoitini inobatga olgan holda, tezlikni me’yordan oshirmasdan, oraliq masofani saqlab harakatlanishlarini so‘raymiz», deyiladi xabarda.

Avvalroq M39 Almati-Toshkent-Termiz xalqaro avtomobil yo‘lining Toshkent viloyati Yangiyo‘l tumani hududidan o‘tgan qismida yo‘lovchi avtobus yonib ketgandi. Bundan tashqari, Samarqand viloyatining Kattaqo‘rg‘on tumanida yo‘lovchi avtobusi boshqaruvni yo‘qotib ag‘darilgan, oqibatda ikki kishi halok bo‘lgandi.