Energetika vazirligi huzurida «Milliy dispetcherlik markazi» tashkil etiladi

Vazirlar Mahkamasining “Energetika vazirligi huzurida “Milliy dispetcherlik markazi” davlat unitar korxonasini tashkil etish to‘g‘risida”gi qarori qabul qilindi.

Markaz “O‘zbekiston milliy elektr tarmoqlari” AJ hamda “Hududiy elektr tarmoqlari” AJning milliy, regional va hududiy dispetcherlik funksiyalarini bajaradi.

Quyidagilar markazning asosiy vazifalari hisoblanadi:

• yagona elektr energetika tizimini operativ boshqarish va uning ishonchli ishlashini ta’minlash;
• yagona elektr energetika tizimi tarkibiga kiruvchi korxonalarning dispetcherlik boshqaruvini amalga oshirish;
• elektr energiyasiga bo‘lgan talab va taklifdan kelib chiqib, uni ishlab chiqarish va iste’mol qilishning har soatlik rejimini shakllantirish;
• yagona elektr energetika tizimining texnik va iqtisodiy jihatdan eng maqbul rejimlarda ishlashini ta’minlash; 
• yagona elektr energetika tizimining qo‘shni davlatlar energetika tizimlari bilan parallel ravishda ishlash rejimlarini boshqarish.

Quyidagilar markaz faoliyatini moliyalashtirish manbalari etib belgilandi:

• elektr energiyasini ishlab chiqaruvchi va taqsimlovchi tashkilotlarga shartnoma asosida dispetcherlik xizmatini ko‘rsatishdan tushadigan mablag‘lar;
• xalqaro moliya tashkilotlari va xorijiy hukumat moliya tashkilotlari mablag‘lari;
• homiylik xayriyalari va qonunchilik hujjatlari bilan taqiqlanmagan boshqa manbalar.