AQSh, Buyuk Britaniya va Avstraliya gipertovushli qurol ishlab chiqishda hamkorlik qiladi

Buyuk Britaniya, AQSh va Avstraliya 5 aprel, seshanba kuni AUKUS harbiy bloki doirasida gipertovushli qurolni yaratish bo‘yicha hamkorlik qilishga kelishib oldi. Bu haqda 5 aprel, seshanba kuni Buyuk Britaniya hukumati saytida chop etilgan bayonotda aytiladi. 

Bayonotda keltirilishicha, mamlakatlar gipertovushli qurolni yaratish va unga qarshi kurashish yo‘llari bo‘yicha yangi uch tomonlama hamkorlikni boshlaydi, shuningdek, axborot almashinuvini kengaytiradi va mudofaa innovatsiyalari sohasidagi hamkorlikni chuqurlashtiradi. 

«Rossiyaning Ukrainaga asossiz va noqonuniy bostirib kirishi munosabati bilan biz inson huquqlari, qonun ustuvorligi va nizolarni majburlashsiz tinch yo‘l bilan hal etishni ta’minlaydigan xalqaro tizimga sodiqligimizni yana bir bor tasdiqladik», — deyiladi press-relizda. 

AQSh va Avstraliyada SCIFiRE deb nomlangan gipertovushli qurol dasturi mavjud. Britaniya rasmiylarining ta’kidlashicha, Buyuk Britaniya hozircha dasturga qo‘shilmaydi, biroq uch davlat o‘z imkoniyatlarini kengaytirish uchun bu sohada tadqiqot va ishlanmalar ustida hamkorlik qiladi. 

Avvalroq, 5 aprel kuni AQSh gipertovushli raketaning yangi muvaffaqiyatli sinovi haqida xabar e’lon qilgan edi. CNN ma’lumotlariga ko‘ra, HAWC gipertovushli qanotli raketa sinovlari mart oyi o‘rtalarida, ya’ni Ukrainadagi urush paytida Rossiya tomonidan «Kinjal» gipertovushli raketasi qo‘llanilganidan bir necha kun o‘tib amalga oshirilgan. Biroq, Amerika mediakompaniyasiga ko‘ra, bu ma’lumot Rossiya bilan munosabatlarda keskinlik yuzaga kelmasligi uchun tarqatilmagan.