Qashqadaryoda fuqaroni pul evaziga ishga kiritmoqchi bo‘lgan tuman tibbiyot bo‘limi inspektori ushlandi

Bosh prokuratura huzuridagi departamentning xabar berishicha, departament hamda DXX Muborak tumani bo‘limlari tomonidan tezkor tadbir o‘tkazilgan.

Tadbirda, Muborak tumani tibbiyot birlashmasi xodimlar bo‘limi inspektori B.G. fuqaro Sh.ni tibbiyot birlashmasi mansabdor shaxslari orqali navbatchi hamshira vazifasiga ishga kiritib qo‘yish evaziga 500 dollar hamda uning shaxsiga oid hujjatlarini olgan vaqtida ashyoviy dalillar bilan ushlangan.

Shuningdek, tadbir davomida tegishli tartibda ko‘zdan kechirilganda B.G.ning xizmat xonasida belgilangan talablarga zid ravishda ro‘yxatga olinmagan va ko‘rib chiqilmasdan qoldirilgan 63 nafar fuqaroning murojaatlari mavjudligi aniqlangan. 

Qayd etilishicha, mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlar o‘tkazilmoqda.