Andijon viloyatida «Andijon suv ta’minoti» AJning tuman filiallaridan biri boshlig‘i yangi qurilgan xonadonga oqava suv tarmog‘ini tortish uchun ruxsat olish hamda kanalizatsiya nasosi o‘rnatishda yordam berish evaziga 8,5 ming AQSh dollari talab qilgan. Davlat xavfsizlik xizmati, Bosh prokuratura huzuridagi departament va ichki ishlar organlari xodimlari hamkorligida o‘tkazilgan tezkor tadbirda u so‘ralgan mablag‘ni uchinchi shaxs orqali olgan vaqtida qo‘lga olindi.
Qashqadaryo viloyatida esa OITSga qarshi kurashish markazining tumanlardan biridagi OIV diagnostika laboratoriyasi laboranti fuqaroga nisbatan tayinlangan ekspertiza xulosasini mansabdor tanishlari orqali uning foydasiga ijobiy hal qilib berish evaziga 3 ming AQSh dollari olgan vaqtida ushlandi. Tezkor tadbir davomida ushbu mablag‘dan 2,5 ming AQSh dollarini olgan Respublika sud-tibbiy ekspertiza ilmiy-amaliy markazining tuman bo‘limi boshlig‘i ham qo‘lga olindi.
Hozirda har ikki holat yuzasidan qonunbuzarlarga nisbatan jinoyat ishlari qo‘zg‘atilib, tergov harakatlari olib borilmoqda.
