Bogʻchalarga ehtiyoj ortayotgan bir paytda Qashqadaryodagi toʻrtta «Erkatoy» sotuvga chiqarildi

Bogʻchalar shu paytgacha narxni oshirib borish usulida 6-marta savdoga chiqarilgan. Ammo potensial xaridor topilmagani uchun sotuv amalga oshmay kelyapti.

Nega bogʻchalar sotilyapti?

Lot hujjatlarida bogʻchalarni xususiylashtirishga asos sifatida 2026-yil 30-yanvardagi PQ-33-son qaror koʻrsatilgan. Mazkur qaror matni ochiq manbalarda mavjud emas.

Kun.uz vaziyatga aniqlik kiritish maqsadida Davlat aktivlarini boshqarish agentligi matbuot xizmati bilan bogʻlandi va «Bogʻchalar nega va qanday asos bilan sotuvga chiqarildi? Nimaga yangi xaridorlarga binoni olganidan keyin bogʻcha faoliyatini davom ettirishga doir majburiyat yuklanmadi?» degan savol bilan murojaat qildi.  

«Tabiiy gaz zaxiralarini koʻpaytirish va «Oʻzbekneftgaz»ni moliyaviy sogʻlomlashtirish boʻyicha qabul qilgan dasturiy hujjatga asosan, «Oʻzbekneftgaz» va uning tarkibidagi tashkilotlarning asosiy faoliyati bilan bogʻliq boʻlmagan aktivlari roʻyxati tasdiqlangan, ularni sotishdan tushgan mablagʻlar aksiyadorlik jamiyatiga yoʻnaltiriladi.
Shu roʻyxatga «Shoʻrtan GKM» MChJga qarashli «Erkatoy-1», «Erkatoy-2», «Erkatoy-3», «Erkatoy-4» bolalar bogʻchalari ham kiritilgan va baholangan qiymat boʻyicha boshlangʻich narx bilan «E-auksion» platformasida ochiq savdolarga chiqarilgan. Bogʻchalarning faoliyatini davom ettirish sharti belgilanmagan. Obyektlarni sotishda boshqa alohida shartlar ham koʻzda tutilmagan», deyiladi rasmiy izohda.

Kun.uz bilan gaplashgan «Erkatoy-3» tarbiyachisi soʻzlariga koʻra, bogʻcha faoliyati 1-iyuldan boshlab toʻxtatilgan. Bu yerda 200 dan ortiq bola boʻlgan, ularni boshqa xususiy bogʻchalarga joylashtirish rejalashtirilgan. Shuningdek, 50 dan ortiq pedagog-tarbiyachi, ishchi-xizmatchilarning ish oʻrinlari  qisqartirilgan va ular ishsiz qolgan.

162-sonli prezident qaroriga koʻra, Maktab va maktabgacha taʼlim vazirligi tizimiga kiruvchi koʻchmas mulk obyektlari nodavlat taʼlim muassasasi tashkil etish va faoliyat turini saqlash sharti bilan ommaviy savdolarga chiqariladi. «Erkatoy» bogʻchalari esa vazirlik tizimiga kirmaydi. Yaʼni agar bu bogʻchalar investorga sotilsa, bogʻcha faoliyat turi saqlab qolinmasligi mumkin. Bu esa taʼlim muassasalarining keyingi taqdirini mavhumlashtiradi.

Maʼlumot uchun, Oʻzbekistonda maktab va bogʻchalar defitsiti asosiy kun tartibidagi masalalardan biri hisoblanadi. 2026-yil holatiga koʻra, mamlakatda 3-5 yoshli bolalar soni 2 mln 632 ming 541 nafarni, 6-7 yoshli bolalar soni esa 1 mln 529 ming 133 nafarni tashkil etadi. Hukumat qarorida 2025-2026 yillarda 3-7 yoshli bolalarni maktabgacha taʼlim bilan qamrab olishni 2 mln 568 ming 946 nafarga yetkazish  belgilangan. Oʻz navbatida, 2025-yilda 17 ming 785 ta yangi bogʻcha oʻrni yaratilgan. Taqqoslash uchun, bu koʻrsatkich 2024-yilda 33 ming 705 tani tashkil qilgan.

«Oʻzbekiston – 2030» strategiyasida ham maktabgacha taʼlim tizimini kengaytirish boʻyicha aniq vazifalar belgilangan : 2026-yilda qamrov 78 foiz, 2028-yilda 79 foiz va 2030-yilga borib 80 foizga yetkazilishi kerak.