Musulmonlar idorasi Hayit namozi o‘qilmasligi haqidagi mish-mishlarni rad qildi

«Ayni kunlarda ijtimoiy tarmoqlarda «Hayit namozi o‘qilmaydigan bo‘ldi, bu borada O‘zbekiston musulmonlari idorasi Ulamolar kengashi fatvosi e’lon qilindi» degan mazmundagi yolg‘on (feyk) xabarlar tarqalmoqda. Mazkur xabarlar asossiz va haqiqatga mos kelmaydi», - deyiladi idora bayonotida.

Ma’lum qilinishicha, ushbu xabarlarda pandemiya davrida – 2021 yil iyul oyida e’lon qilingan ma’lumot takroran tarqatilmoqda. Joriy yilda O‘zbekiston musulmonlari idorasi Ulamolar kengashi bunday fatvo chiqarmagan.

«O‘zbekistonda koronavirus infeksiyasi bilan kasallanish ko‘rsatkichlarida o‘zgarishlar bo‘layotgan bo‘lsa-da, lekin ommaviy tadbirlarni cheklash yuzasidan Respublika maxsus komissiyasining qarori e’lon qilingani yo‘q», - deyiladi bayonotda.

Shuningdek, Musulmonlar idorasi Qurbon hayiti namozini o‘qish yuzasidan o‘zgarish bo‘lsa, rasmiy nashrlarda e’lon qilinishini bildirib, asossiz va haqiqatga to‘g‘ri kelmaydigan xabarlarni tarqatmaslikni iltimos qilgan.

Eslatib o‘tamiz, 1 iyul kuni imzolangan «Qurbon hayitini nishonlash to‘g‘risida»gi prezident qarorida O‘zbekiston musulmonlari idorasi Ulamolar kengashining Qurbon hayitining birinchi kuni 9 iyul – shanba kuniga to‘g‘ri kelishi to‘g‘risidagi axboroti inobatga olinib, Qurbon hayiti bayramini o‘tkazish chora-tadbirlari belgilangan edi.