O‘zbekistondagi barcha masjidlarda yomg‘ir so‘rab, «istisqo» namozi o‘qiladi - Musulmonlar idorasi

O‘zbekistonda kuz fasli yomg‘irsiz o‘tayotgani, kelgusi kunlarda ham yog‘ingarchilik kutilmayotgani tufayli muftiy tashabbusi bilan, 28 noyabr kuni juma namozidan keyin — O‘zbekistondagi barcha masjidlarda «yomg‘ir so‘rab, jamoat bilan ikki rakaat istisqo namozi o‘qiladi». Shuningdek, Umra ziyoratidagi imomlardan ham Ikki Haramda o‘z guruhlari ishtirokida istisqo namozini o‘qish so‘ralgan.

O‘zbekistonda joriy yilda kuz fasli yomg‘irsiz o‘tayotgani, kelgusi kunlarda ham yog‘ingarchilik kutilmayotgani, yomg‘ir esa rizqu ro‘z, mo‘l-ko‘lchilik omili ekani e’tiboridan O‘zbekiston musulmonlari idorasi raisi, muftiy Nuriddin Xoliqnazar hazratlari tashabbus bilan chiqqan. Unga ko‘ra, 2025 yil 28 noyabr kuni juma namozidan keyin O‘zbekistondagi barcha masjidlarda «Alloh taolodan tavba-tazarru, istig‘for ila yomg‘ir so‘rab, jamoat bilan ikki rakaat istisqo namozi o‘qiladi». Bu haqda Musulmonlar idorasi matbuot xizmati ma’lum qildi.

«Islom tarixida qurg‘oqchilik kuzatilgan paytlarda istisqo namozi o‘qilgani va uning samarasi ko‘rilgani keltirilgan. Xususan, Payg‘ambarimiz sollallohu alayhi vasallam yomg‘ir yog‘may, suvsizlik bo‘lgan davrlarda jamoat bilan qiblaga yuzlanib duo qilganlari, keyin o‘zlari imom bo‘lib namoz o‘qiganlari rivoyat qilingan. Alloh taolodan suv-yomg‘ir so‘raladigan istisqo namozi fazilati hadis kitoblarida bayon qilingan», deyiladi diniy idoraning tushuntirishida.

Bundan tashqari, viloyatlar, tuman-shaharlar markaziy masjidlari va ziyoratgohlarda jonliqlar so‘yilib, yordamga muhtoj oilalar va boshqa muhtojlarga tarqatiladi.

Shuningdek, diniy idora Islom ta’lim muassasalari ustoz va talabalari tomonidan Imom Buxoriy «Sahihi Buxoriy» asari 28 noyabr — juma namoziga qadar «xatmi kutub» qilinishini bildirdi. «Zero, Imom Buxoriyning «Sahih»lari qurg‘oqchilikda o‘qilganda, Alloh taoloning irodasi ila yomg‘ir yog‘gani tarix kitoblarida yozilgan» deyiladi xabarda.

Bundan tashqari, Umra ziyoratida bo‘lib turgan imom-domlalarga Ikki Haramda ham o‘z guruhlari ishtirokida istisqo namozini o‘qishlari tavsiya etilgan.

Yomg‘irsiz kunlar va ifloslangan havo

Eslatib o‘tamiz, joriy yildagi qurg‘oqchilik oqibatlarini — ko‘pchilik ifloslangan havo tufayli o‘z tanasida his qila boshladi. Atmosfera havosi ifloslanishi, stansiyalar ma’lumotlariga binoan, Toshkent shahrida xavotirli holatga yetdi. Mutaxassislar zaruratsiz ko‘chalarga chiqishdan qaytarmoqda.

Keskin vaziyat ortidan 25 noyabr kuni prezident Shavkat Mirziyoyev «Toshkent shahrida ekologik vaziyatni yaxshilash bo‘yicha kechiktirib bo‘lmaydigan chora-tadbirlar to‘g‘risida»gi farmonni imzoladi. Hujjatga muvofiq, poytaxtda ekologik muammolarni hal etish bo‘yicha maxsus komissiya tuzildi.

Mazkur komissiya zimmasiga poytaxtda havo sifati, yashil hududlarni asrash va ko‘paytirish, transportlar va korxonalardan chiqadigan zararli moddalarni kamaytirish kabi vazifalar yuklatildi.

Poytaxt atrofidagi issiqxonalarga gaz yetkazib berish tiklangani ma’lum qilindi. Buning ortidan ekologiya mutasaddilari hamda huquqni muhofaza qilish idoralari tomonidan Toshkent shahri va viloyatida havo ifloslanishiga qarshi keng ko‘lamli reyd tadbirlari kuchaytirildi.