Qoʻshimcha funksionallar
-
Tungi ko‘rinish
“Toshkent suvenirlari” ko‘rgazma-savdosi o‘z ishini boshladi
Toshkent shahrida “Hunarmand” uyushmasi hamda Savdo-sanoat palatasi hamkorligida “Toshkent suvenirlari” ko‘rgazma-savdosi ochildi.
O‘zbekiston Respublikasi “Hunarmand” uyushmasi hamda O‘zbekiston Savdo-sanoat palatasi hamkorligida joriy yilning 19-21 avgust kunlari Toshkent shahridagi Sayilgoh ko‘chasida “Toshkent suvenirlari” ko‘rgazma-savdosi bo‘lib o‘tmoqda.
Tadbirda keng jamoatchilik va xalqaro diplomatik korpus vakillari, elchixonalar, O‘zbekistonda faoliyat olib borayotgan xalqaro tashkilotlar vakillari, turli vazirlik va idoralar xodimlari, respublikamiz viloyatlaridan kelgan mehmonlar, yurtimizda mehmon bo‘lib turgan chet ellik sayyohlar, respublika va xorijiy ommaviy axborot vositalari xodimlari ishtirok etishyapti.
“Toshkent suvenirlari” ko‘rgazma-savdosi hunarmandchilikni yanada rivojlantirish, ishlab chiqargan suvenir turlarini kengaytirish va ularning ommabopligini aniqlash, sifat va dizayni ustida ish olib borish, chet ellik mehmonlarning mahsulotlarga bo‘lgan talab va ehtiyojlarini o‘rganishdan iborat.
“Hunarmand” uyushmasi raisi Ulug‘bek Abdullayevga ko‘ra, bu ko‘rgazma respublikada ilk marta o‘tkazilyapti:
“Ko‘rgazma-savdoda respublikaning 14 hududidan 300dan ortiq hunarmandlar, xalq amaliy san’ati ustalari hunarmandchilik mahsulotlari va milliy matolar adras atlas, zargarlik buyumlari, kulollik, gilamchilik, zardo‘zlik, kashtachilik va hunarmandchilikning boshqa yo‘nalishlarida mahorat darslari bilan ishtirok etadi.
Tadbir 3 kunga mo‘ljallangan bo‘lib, barcha mahsulotlar oddiy xalq orasidagi hunarmandlar tomonidan qo‘l mehnati bilan yaratilgan”,- deydi u.
Ko‘rgazma-savdoda ishtirokchilar hunarmandlar tomonidan mahorat darslarini kuzatish va bevosita ishtirok etish imkoniyatiga ega bo‘ldi. Tadbirlarda qatnashish istagini bildirgan mehmonlar o‘z qo‘llari bilan loydan ko‘za yasab ko‘rishlari, ipakdan mato to‘qishlari, do‘ppiga naqsh berib ko‘rishlari, beshik yasash jarayonlarida bevosita ishtirok etishlari mumkin.
“Toshkent suvenirlari” ko‘rgazma-savdosi davomida biznes vakillari hunarmandlar bilan foydali shartnomalar tuzishlari mumkin bo‘ladi.
Dastlabki hisob-kitoblarga ko‘ra, 100 mingdan ortiq kishi tashrif buyurishi rejalashtirilgan tadbir bugun ham davom etmoqda.
"Hunarmand" yushmasi Axborot xizmati
