Energetika vazirligi O‘zbekistonda elektr energiyasi ishlab chiqarish kamaygani haqidagi ma’lumotni rad etdi

Ijtimoiy tarmoqlarda rasmiy statistika ma’lumotlariga tayangan holda yanvar-iyul oylarida elektr energiyasini ishlab chiqarish ko‘rsatkichlari qisqargani ma’lum qilindi. Unda Statistika qo‘mitasidan olingan ma’lumotda yanvar-iyulda 40 mlrd 43 mln kVt/soat elektr energiyasi ishlab chiqarilib, bu o‘tgan yil shu davriga nisbatan 297 mln kVt/soat kam ekani qayd etilgan.

Vazirlikning ma’lum qilishicha, joriy yil yanvar-iyul oylarida respublika bo‘yicha 43 mlrd 250 mln kVt/soat yoki o‘tgan yil mos davriga nisbatan 2 mlrd 177 mln kVt/soat ko‘p (o‘sish sur’ati 5,3 foiz) elektr energiyasi ishlab chiqarilgan.

Issiqlik elektr stansiyalari va markazlarida 38 mlrd 551 mln kVt/soat (o‘tgan yilga nisbatan 1 mlrd 18 mln kVt/soat ko‘p, o‘sish sur’ati 2,7 foiz) elektr energiyasi ishlab chiqarilgan. Jumladan, «Issiqlik elektr stansiyalari»da - 33 mlrd 77 mln kVt/soat, Angren IES va Yangi Angren IES tomonidan - 3 mlrd 345 mln kVt/soat.

Bundan tashqari, DXSh asosidagi yangi IESlarda - 2 mlrd 128 mln kVt/soat, DXSh asosidagi quyosh fotoelekr stansiyalar tomonidan - 219 mln kVt/soat, gidroelektr stansiyalarda esa - 4 mlrd 84 mln kVt/soat (898 mln kVt/soat ko‘p).

Elektr stansiyalarida amalda ishlab chiqarilgan hamda Statistika qo‘mitasi ma’lumoti asosida berilgan elektr energiyasi miqdorlari orasida yuzaga kelgan farq quyidagi sabablar bilan izohlangan:

birinchidan, qo‘mita ma’lumotida kichik korxonalar toifasiga kiritilgan elektr energiyasi ishlab chiqaruvchilar inobatga olinmagan. DXSh asosida Turkiya kompaniyalari bilan hamkorlikda Buxoro, Toshkent va Xorazmda ishga tushirilgan 5 ta yangi issiqlik elektr stansiyasi, Navoiy va Samarqandda ishga tushirilgan 2 ta quyosh fotoelektr stansiyasi hamda Ohangaron, Hisorak, Qamchiq gidroelektr stansiyalarida ishlab chiqarilgan elektr energiyasi hisobga olinmagan. Ushbu stansiyalar tomonidan yanvar-iyul oylarida ishlab chiqarilgan elektr energiyasi 2 mlrd 515 mln kVt/soatni tashkil etgan;

ikkinchidan, Qibray tumanida «Aksa Enerji», kompaniyasi tomonidan ishga tushirilgan IES orqali ishlab chiqarilgan 1 mlrd 78 mln kVt/soat elektr energiyasini ishlab chiqarish sifatida emas, balki elektr energiyasini sotish sifatida kiritgan;

uchinchidan, ba’zi elektr energiyasi ishlab chiqaruvchi korxonalar tomonidan har oy yakunida qo‘mitaga «tarmoqqa berilgan» elektr energiyasi bo‘yicha raqamlar taqdim etiladi. Ular tomonidan «O‘zbekiston milliy elektr tarmoqlari»ga «umumiy ishlab chiqarish» bo‘yicha raqamlar uzatiladi. Shu va boshqa sabablarga ko‘ra raqamlar orasida yana 802 mln kVt/soat farq yuzaga kelgan va bu ko‘rsatkich statistika ma’lumotlarida aks etmagan.