Farg‘onada IIB xodimlari tomonidan mastlik holatini tekshirish uchun olib ketilayotgan fuqaro to‘satdan vafot etdi

Aniqlanishicha, 27 avgust kuni soat 19:00 larda Quvasoy shahar “Yuqori Mo‘yan” MFY hududida 1962 yilda tug‘ilgan fuqaro X.T. jamoat tartibini buzuvchi harakatlar sodir etgan.

Xabarga ko‘ra, shuning uchun Quvasoy shahar IIB xodimlari tomonidan mastlik holatini tekshirish maqsadida shahar tibbiyot birlashmasiga olib ketilayotgan vaqtda uning sog‘lig‘i yomonlashib, ko‘rsatilgan tibbiy yordamga qaramasdan vafot etgan. 

Sudga oid tibbiy ekspertiza dastlabki ma’lumotiga ko‘ra, X.T.ning o‘limiga “Yurak ishemik kasalligi, yurak toj qon tomirlari o‘tkir yetishmovchiligi, o‘ng tomonlama pnevmoniya, surunkali plevrit, oshqozon osti beziga qon quyilishi, alkogoldan zaharlanish” tashxisi qo‘yilgan. 

Hozirda mazkur holat yuzasidan Quvasoy shahar prokuraturasi tomonidan tergovga qadar tekshiruv olib borilmoqda. 

Tekshiruv jarayoni viloyat prokuraturasi tomonidan nazoratga olingan.