Fuqarolarning «Temir daftar»ga kirish bo‘yicha hokim yordamchisiga elektron murojaat qilish tizimi yo‘lga qo‘yiladi

“Ijtimoiy ahvoli va turmush sharoiti og‘ir oilalar muammolarini hal etish hamda aholini tadbirkorlikka jalb qilish tizimlarini takomillashtirish munosabati bilan Vazirlar Mahkamasi ayrim qarorlariga o‘zgartirish va qo‘shimchalar kiritish to‘g‘risida”gi hukumat qarori loyihasi e’lon qilindi.

Ehtiyojmand fuqarolarni “Temir daftar”ga kirish yuzasidan kelib tushgan murojaatlarni ko‘rib chiqish tizimini takomillashtirish va tadbirkorlik sub’yekti ― jismoniy shaxs faoliyati davomiyligini ta’minlash maqsad qilingan.

Hukumat ayrim qarorlariga quyidagilarni nazarda tutuvchi qo‘shimchalar kiritiladi:

2022 yil 1 dekabrdan fuqarolar tomonidan “Temir daftar”ga kirish yuzasidan tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha tuman (shahar) hokimi yordamchisiga elektron murojaat qilish tizimini yo‘lga qo‘yish;

2023 yil 1 yanvardan Davlat xizmatlari markazi tomonidan tadbirkorlik sub’yekti ― jismoniy shaxs tomonidan faoliyatini to‘xtatish uchun kelib tushgan arizani ma’lumot uchun tegishliligi bo‘yicha hokim yordamchisiga elektron xabarnoma yuborish tizimini yo‘lga qo‘yish.

Qaror bajarilishini nazorat qilish bosh vazir moliya-iqtisodiyot va kambag‘allikni qisqartirish masalalari bo‘yicha o‘rinbosari — iqtisodiy taraqqiyot va kambag‘allikni qisqartirish vaziri Jamshid Qo‘chqorov zimmasiga yuklanadi.