Samarqandda mahbusning uchta qovurg‘asi singani aniqlandi. Holat u tergov hibsxonasiga kelgunga qadar sodir bo‘lgani aytilmoqda

23 oktabr kuni O‘zbekiston Inson huquqlari «Huquqiy tayanch» jamoat birlashmasining Facebook’dagi sahifasida shu yilning 1 oktabr kuni Ichki ishlar xodimlari tomonidan hibsga olingan, Jinoyat kodeksining 273-moddasi 5-qismida ko‘zda tutilgan (Giyovandlik vositalari, ularning analoglari yoki psixotrop moddalarni ko‘p miqdorda qonunga xilof ravishda sotish) jinoyatni sodir etishda gumonlanayotgan urgutlik erkak ichki ishlar xodimlari tomonidan qiynoqqa solingani, oqibatda gumonlanuvchining uchta qovurg‘asi singani va tana qismida jarohat izlari mavjudligi haqida xabar berilgan.

Qayd etilishicha, hibsga olingandan so‘ng ushbu shaxs qariyb 20 kun davomida na yaqinlari, na advokat bilan uchrashtirilmagan. Dastlab vaqtincha ushlab turish hibsxonasida saqlangan erkak keyinchalik Kattaqo‘rg‘on shahridagi tergov hibsxonasiga o‘tkazilgan.

Oliy Majlisning Inson huquqlari bo‘yicha vakili (Ombudsman) axborot xizmati ushbu xabarga aniqlik kiritish maqsadida Ombudsmanning Samarqand viloyatidagi mintaqaviy vakili 23 oktabr kuni 7-son Tergov hibsxonasiga borib, mahbus A.E. bilan xoli tarzda uchrashganini ma’lum qildi.

Suhbat davomida mahbus «Huquqiy tayanch» jamoat birlashmasi tarqatgan ma’lumotni tasdiqlagan va o‘ziga tan jarohati yetkazgan xodimlarga nisbatan qonuniy chora ko‘rilishida amaliy yordam so‘ragan. Mahbusning murojaati uning tibbiy holatiga oid ma’lumotlar bilan birga Ombudsman nomidan Bosh prokuraturaga yuborilgan.

IIV Jazoni ijro etish departamenti axborot xizmati rahbari Zoyir Yo‘ldoshev Kun.uz muxbiri bilan telefon orqali muloqotda mahbus hibsxonaga olib kelingunga qadar jarohatlanganini aytmoqda.

“Holatni ayni paytda prokuratura o‘rganmoqda. Bizning xodimlarimiz unga kuch ishlatmagan. Mahbus ham prokuraturaga yozgan arizasida qiynoq qo‘lga olingan vaqtda Samarqand viloyat IIB Jinoyat-qidiruv bo‘limi tezkor xodimlari tomonidan qo‘llanganini aytmoqda. Bu voqea haqiqatda sodir bo‘lgan yoki bo‘lmaganiga prokuratura aniqlik kiritmoqda. Bu hozircha mahbus bergan ko‘rsatma. Buni u prokuror bilan uchrashuv vaqtida aytgan.

Mahbus tergov hibsxonaga olib kelingandan so‘ng albatta tibbiy tekshiruv o‘tkaziladi, badanida qanday chandig‘i bor, qanday jarohati bor, kasalliklari aniqlanib, dalolatnoma tuziladi. Tekshiruv vaqtida uning qovurg‘asida kamchilik aniqlangan. Shifokorlarimiz tomonidan ushbu holat aniqlanganidan so‘ng prokuraturaga ma’lumot berilgan.

U holatni o‘rganish uchun kelgan prokuratura vakiliga 3-4 oy oldin mototsikldan yiqilgandim, bu o‘sha paytdagi jarohat deb aytgan. Izolyatorda advokati bilan uchrashgandan keyin u ko‘rsatmasini o‘zgartirib, ushlash vaqtida tezkor xodimlar meni urgandi, deb prokuraturaga murojaat qilgan. Aslida nima bo‘lgani prokuratura surishtiruvidan so‘ng ma’lum bo‘ladi”, deydi IIV JIED mulozimi.

Samarqand viloyati IIB boshlig‘i matbuot kotibi Jahongir Sagdullayevga ko‘ra, “qovurg‘asi urib sindirilgani” aytilayotgan shaxs 29 sentabr kuni Samarqand shahri bo‘yicha IIO FMB 5-son IIB xodimlari tomonidan “Qoradori-22” tadbirida 5.25 gramm miqdordagi geroin giyohvandlik moddasini sotgan vaqtida ushlangan. Undan narkotik modda ashyoviy dalil tariqasida hujjatlashtirib olingan.

Mazkur holat yuzasidan 1 oktabr kuni gumonlanuvchi va boshqalarga nisbatan Jinoyat kodeksining 25, 273-moddasi 5-qismi bilan jinoyat ishi qo‘zg‘atilgan. Ayni paytda dastlabki tergov harakatlari olib borilmoqda.

“Tezkor xizmat xodimlari ushbu shaxsni ashayoviy dalillar bilan qo‘lga olgan vaqtida u jarohati borligini bayon qilgan. Ya’ni u 20 sentabr kuni Urgut tumanida o‘ziga tegishli bo‘lgan IJ rusumli mototsiklidan yiqilganligini aytgan. Xodimlar fuqaroni Samarqand shahriga olib kelib, tibbiy ko‘rikdan o‘tkazishgan. Shifokor tibbiy ma’lumotnomasi, haqiqatdan o‘zi tadbirdan 10 kun oldin mototsiklidan yiqilganligi to‘g‘risidagi fuqaroning bergan tushuntirish xati hamda holat bo‘yicha tuzilgan dalolatnomalar mavjud”, deyiladi rasmiy munosabatda.

Avvalroq Samarqanddagi 60 o‘rinli maxsus qabulxonada 160 nafar mahkum saqlanayotgani, bu yerdagi shaxslarning yashash sharoitlari o‘rganilganda bir qator kamchiliklar aniqlangani xabar qilingandi.