Daniyada muddatidan oldin parlament saylovlari bo‘lib o‘tyapti

Daniyada muddatidan oldin parlament saylovlari boshlandi. 1 noyabr seshanba kuni 4,3 millionga yaqin saylovchi 179 nafar xalq deputatini saylaydi. Saylov uchastkalari soat 20.00 (Toshkent vaqti bilan 24.00)gacha ochiq bo‘ladi, saylov natijalarining dastlabki prognozlari ular yopilgandan so‘ng darhol kutilmoqda. Dastlabki natijalar saylovdan keyin tunda e’lon qilinishi rejalashtirilgan.

Bir palatali parlamentdagi o‘rinlar uchun 14 partiyadan nomzodlar kurash olib boradi. Folketingda o‘rinlarni qo‘lga kiritish uchun ularni saylovchilarning kamida 2 foizi qo‘llab-quvvatlashi kerak.

Daniyada saylovoldi tashviqoti birinchi navbatda ichki masalalarga, xususan, yuqori inflatsiya va energiya narxining keskin oshishi atrofidagi vaziyatga qarshi kurashga qaratilgan edi. Ovoz berish natijasi juda noaniq deb hisoblanyapti.

Sotsial-demokrat Mette Frederiksen 2019 yil iyun oyida bo‘lib o‘tgan saylovlardan so‘ng faqat o‘z partiyasidan tashkil topgan ozchilik hukumatini boshqargan, unda uning partiyasi eng ko‘p ovoz to‘plagandi. Ba’zi muammolarni, xususan, qat’iy migratsiya siyosatini hal qilishda u, boshqa narsalar qatori, o‘ng qanot konservativ blokining ovozlariga tayandi.

Bu saylovda 44 yoshli Frederiksen an’anaviy siyosiy bloklardan ustun bo‘lgan hukumatni maqsad qilgan. Ukrainadagi urush, energetika inqirozi va boshqa global muammolarni hisobga olgan holda, u keng siyosiy doiradagi partiyalar bilan hamkorlik qilish zarur deb hisoblaydi. Olti partiyadan iborat va liberal-konservativ Venstre partiyasi yetakchisi Yakob Ellemann-Yensen boshchiligidagi o‘ng markazchilar bloki bunday ittifoqda ishtirok etishdan bosh tortmoqda.