OAV Ispaniyada Putin ma’muriyati rahbari o‘rinbosarining oilasiga tegishli yer uchastkalari va villani aniqladi

Rossiya prezidenti ma’muriyati rahbarining birinchi o‘rinbosari Sergey Kiriyenkoning oilasi ishonchli vakili orqali Ispaniyada ikkita yer uchastkasi va villasiga egalik qiladi. Bu haqda 9 noyabr, chorshanba kuni «Vajnyye istorii» nashri xabar berdi. Uning ma’lumotiga ko‘ra, umumiy maydoni 2,4 gektar bo‘lgan o‘rmon uchastkalari Kiriyenkolar oilasining ishonchli vakili Robert Gndolyanning Bell-67 ispan kompaniyasiga tegishli. Xuddi shu kompaniya Kataloniyadagi Kosta-Bravada villaga egalik qiladi, u haqda "Sobesednik" nashri 2020 yilda Sergey Kiriyenkoning qarindoshlari uchun dam olish maskani sifatida yozgan.

«Vajnyye istorii» ta’kidlashicha, Robert Gndolyan Kiriyenkoning o‘g‘li - Vladimirning sinfdoshi. Jurnalistlarning qayd etishicha, kichik Kiriyenko "Rostelekom" vitse-prezidenti lavozimini egallaganidan so‘ng Gndolyan kompaniya shu’ba korxonalaridan birining direktori bo‘lgan. Shuningdek, u katta Kiriyenko tomonidan asos solingan Sarovbiznesbankdagi Vladimir Kiriyenkoning ulushini olgan.

Sergey Kiriyenko prezident ma’muriyatining ichki siyosati uchun mas’uldir, uni «Donbass kuratori» deb atashadi, deya yozmoqda "Vajnyye istorii". 2022 yil martida Kiriyenko Rossiyaning Ukrainaga keng ko‘lamli harbiy bostirib kirishi munosabati bilan AQSh sanksiyalari ostida qolgan. Kanada, Avstraliya, Yaponiya, Yangi Zelandiya va Ukraina ham amaldorga nisbatan cheklov choralarini kiritdi. YeI va Buyuk Britaniya avvalroq Sergey Kiriyenkoni Aleksey Navalniyning zaharlanishi bilan bog‘liq hodisa yuzasidan qora ro‘yxatga kiritgan edi. Rossiya prezidenti ma’muriyati rahbari birinchi o‘rinbosarining o‘g‘li 2022 yil fevralidan beri AQSh sanksiyalari ostida.

2020 yilda «Proyekt» jurnalistik surishtiruvlar portali Sergey Kiriyenkoning Rublyovkadagi uyi haqida yozgandi. Jurnalistlar ushbu obekt «Landshaft» kottej posyolkasidagi qariyb 7000 kvadrat metr maydonda qurilganini aniqladi. Ushbu hududda asosiy binodan tashqari, sport majmuasi va xavfsizlik xodimlari uchun uy joylashgan.