“O‘zbekneftgaz” AJ Boshqaruvi raisi Mehriddin Abdullayev mamlakatimiz aholisini va iqtisodiyot tarmoqlarini, ayniqsa kuz-qish mavsumida tabiiy gaz bilan uzluksiz ta’minlash ustuvor vazifa ekanligini aytib, ishga tushirilgan ushbu obektlar yuqoridagi maqsadlarga xizmat qilishi muqarrar hisoblanishini ta’kidladi.
Muborak boshqarmasining “O‘zbekneftgaz” AJ tomonidan qazib chiqarilayotgan tabiiy gazdagi ulushi deyarli 45 foizni tashkil qiladi. 2022 yilda boshqarma konlaridan 15,0 mlrd kub metr tabiiy gaz qazib chiqarishi kutilmoqda.
Hududda geologiya-qidiruv ishlarini amalga oshirishga alohida e’tibor qaratilib, 2017-2021 yillarda jami 6 ta uglevodorod konlari ochildi (“Chordarbaza”, “Do‘ltatepa”, “Quyi Pomuq”, “Yangi Olot”, “Ijobat”, “Razzoqbobo”) va 74,6 mlrd kub metr hajmda tabiiy gaz hamda 3,1 mln tonna hajmda suyuq uglevodorodlar zaxirasi o‘stirildi.
Joriy yilning yanvar-oktabr oylarida bajarilgan ishlar natijasida 2 ta yangi kon ochildi (“Quyi Pomuq”, “Yangi Olot”) hamda 6,2 mlrd kub metr hajmda tabiiy gaz va 356 ming tonna hajmda suyuq uglevodorodlar zaxirasi o‘stirildi. Yil oxiriga qadar bu ko‘rsatkichni 12,0 mlrd kub metrga yetkazish kutilmoqda.
Loyiha bosh pudratchisi – “Enter Engineering” kompaniyasi tomonidan qisqa muddatlarda qiymati 87,8 mln dollarlik texnologik obekt qurib bitkazildi. Zamonaviy gaz-turbina uskunalari va kompressorlar yetakchi xorijiy kompaniyalar, ya’ni “Baker Hughes”, “Akchelik”, “DenEyr Enerji”, “IGNK”, “Shandong Vintex” va boshqa kompaniyalar tomonidan yetkazib berildi.
Mazkur qurilmani foydalanishga topshirish natijasida kunlik qo‘shimcha 1 mln kub metr gaz qazib olish imkoni yaratildi. Shu bilan birga, uzunligi 47 kilometr bo‘lgan “Tegirmon-Somontepa” gaz quvurining qurilishi yiliga 1 mlrd kub metr gazni transportirovka qilish imkonini beradi.
O‘tgan yili “Alan” va “Zevarda” siquv kompressor stansiyalarining ishga tushirilishi, bugun esa “Dengizko‘l” siquv kompressor stansiyasining foydalanishga topshirilishi ko‘zlangan maqsadlarga erishishga yordam beradi.
Yuqoridagi obektlarni qurishga jonbozlik ko‘rsatgan 40 dan ortiq ishchi va xodimlar, jumladan texnologik uskunalarning ishlab chiqaruvlarni jamiyat rahbariyatining tashakkurnomasi hamda esdalik sovg‘alari bilan taqdirlandi.
