«Oʻzbekneftgaz» oʻz ulushi mavjud boʻlgan qoʻshma korxonalarda taʼsischi sifatidagi huquq va manfaatlarini toʻliq taʼminlash, shuningdek, ishlab chiqarish hamda moliyaviy samaradorlikni oshirishga qaratilgan tizimli ishlarni boshladi, deya xabar berdi kompaniya matbuot xizmati.
Qayd etilishicha, 21-avgust kuni «Oʻzbekneftgaz» boshqaruv raisi ishtirokidagi yigʻilishda «Natural Gas-Stream», «New Silk Road Oil and Gas» va «ANDIJANPETRO» qoʻshma korxonalari faoliyati tanqidiy-tahliliy muhokama qilindi.
Dastlabki tahlillar qoʻshma korxonalar faoliyatida boshqaruv, hisobdorlik va moliyaviy intizom bilan bogʻliq qator tizimli muammolar mavjudligini koʻrsatgan. Xususan, ayrim korxonalarda ish jarayonlari yetarli darajada tartibga solinmagani, buxgalteriya hisobi va moliyaviy hisobotlar boʻyicha shaffoflik taʼminlanmagani, «Oʻzbekneftgaz» oldidagi hisobdorlik mexanizmlari toʻliq yoʻlga qoʻyilmagani qayd etildi.
Natijada qazib chiqarish hajmlarining yildan-yilga pasayishi, investitsiya mablagʻlaridan samarali foydalanish bilan bogʻliq savollar, moliyaviy barqarorlikning taʼminlanmagani va dividend toʻlovlari boʻyicha majburiyatlarning toʻliq bajarilmagani kabi masalalar yuzaga kelgan. Shu paytga qadar korxonalar faoliyati ustidan taʼsischi tomonidan zarur darajada nazorat oʻrnatilmagani mavjud muammolarning avj olishiga sabab boʻlgani taʼkidlandi.
«Endilikda jamiyat ulushi mavjud boʻlgan har bir qoʻshma korxona faoliyatida korporativ boshqaruv tamoyillariga qatʼiy rioya etilishi, taʼsischining huquq va manfaatlari toʻliq taʼminlanishi, moliyaviy va ishlab chiqarish koʻrsatkichlari shaffof nazorat qilinishi talab etiladi. Xususan, korxonalarning qazib chiqarish quvvatlari, geologiya-qidiruv ishlari va geologik-texnik tadbirlar samaradorligi qayta tahlil qilinadi. Shuningdek, «Oʻzbekneftgaz» AJdan mavjud qarzdorliklarni xatlovdan oʻtkazish, moliyaviy oqimlar va xaridlarni nazorat qilish tizimini raqamlashtirish boʻyicha choralar belgilandi», deyiladi kompaniya xabarida.
Qoʻshma korxonalarda rejalashtirilayotgan har bir tadbir, investitsion loyiha va ish jarayoni «Oʻzbekneftgaz» bilan kelishiladi. Bunda har bir tadbirning zaruriyati, iqtisodiy samaradorligi va qiymati chuqur tahlil qilinib, jamiyatning roziligi olinganidan soʻng amalga oshirilishi belgilandi.
