U o‘z «xizmati»ni 400 AQSh dollariga baholagan. Bu haqda Jizzax viloyati IIb axborot xizmati xabar bermoqda.
Ma’lum qilinishicha, Baxmal tumani “Olomon” MFYda yashovchi, avtomobillarga xizmat ko‘rsatish korxonasi ish boshqaruvchisi vazifasida ishlab kelgan U.A. IIBga haydovchilik guvohnomasini olib berishini aytib salmoqli miqdordagi pulini o‘zlashtirgan shaxsga chora ko‘rishni so‘ragan.
Uning murojaati bo‘yicha o‘tkazilgan surishtiruvlarda Sharof Rashidov tumani “Sharilloq” MFYda istiqomat qiluvchi, Jizzax shahridagi sport texnik klubi o‘qituvchisi A.S. jabrlanuvchi U.A.ni haydovchilik guvohnomasi olib berishga ishontirib, «xizmat haqi» evaziga undan 400 dollar olib, ehtiyojlari uchun ishlatib yuborgani aniqlangan.
Qayd etilishicha, holat yuzasidan Jinoyat kodeksining 168-moddasi 1-qismi bilan jinoyat ishi qo‘zg‘atilgan.
Avvalroq, Qashqadaryo va Navoiyda haydovchilik guvohnomasini olib bermoqchi bo‘lgan shaxslar ushlangandi.
