Polsha O‘zbekistondan paxta va ipak sotib olish hajmini oshiradi

Davra suhbatida ma’ruza bilan ishtirok etgan elchi Bahrom Boboyev GSP+ benefitsiar maqomini olish mahalliy to‘qimachilik mahsulotlarini eksport qiluvchilar uchun zamin yaratishini, bu keyinchalik barqaror o‘sish va eksport mahsulotlari assortimenti diversifikatsiyasini ta’minlashini ta’kidladi. Bu O‘zbekiston va Yevropa Ittifoqi o‘rtasida to‘qimachilik mahsulotlari savdosi uchun YeIda o‘zbek to‘qimachilik mahsulotlariga nisbatan qo‘llaniladigan tranzit, bojxona va soliq to‘lovlari, ushbu turdagi mahsulot savdosidagi miqdoriy cheklovlarni olib tashlash nuqtayi nazaridan mustahkam huquqiy asos yaratdi.

Polsha vakillari O‘zbekiston yengil sanoat korxonalari mahsulotlarini to‘g‘ridan to‘g‘ri shartnomalar bo‘yicha mamlakatdagi savdo uylari orqali ilgari surish maqsadga muvofiqligiga e’tibor qaratdilar. Bu xalqaro amaliyot yuksak darajada oqlanadi va mamlakatga tovarlar eksportini sezilarli darajada oshirishni rag‘batlantiradi.

Ular aytishicha, O‘zbekiston korxonalari tayyor mahsulot ishlab chiqarish, shu orqali texnik jihozlanishi va ishlab chiqarishni modernizatsiya qilish istagi sanoat o‘ziga xos tendensiyasidir. Bu mehnat xarajatlarini kamaytirish va tayyor mahsulot ishlab chiqarishni ko‘paytirish imkonini beradi.

Polsha kompaniyalari vakillari o‘z korxonalari ehtiyojlari uchun O‘zbekistondan paxta, to‘quvchilik va trikotaj kalava, paxta, ipak va jun gazlama hamda boshqa mahsulotlar yetkazib berilishidan manfaatdor ekanini bildirdi. Ular o‘zbek ishlab chiqaruvchilariga Yevropa boshqa bozorlariga chiqishda yordam berishga tayyor ekanini tasdiqladi.

Polshalik tadbirkorlar o‘zbek to‘qimachilik mahsulotlarini eksport va import qilishdan manfaatdor yirik to‘qimachilik korxonalari va kompaniyalari rahbarlari ishtirokida hamkorlik yo‘nalishlarini muhokama qilish uchun O‘zbekiston vakillarini Varshavaga taklif qilishga tayyor ekanini bildirdi.