Farg‘onada profilaktika inspektori o‘zini otib qo‘ydi

O‘zining bosh qismiga tabel quroli bilan o‘q uzgan inspektor Katta Farg‘ona kanali yoqasidagi yo‘l bo‘yida, o‘zining Spark avtomobilida koma holatida topilgan va shifoxonaga yotqizilgan. U avgust oyida totalizatorda 45 mln so‘m yutqazgani uchun intizomiy nazoratda turgan.

Foto: Kun.uz

Toshloq tumanida profilaktika inspektori tabel quroli bilan o‘zining boshiga o‘q uzgan. Bu haqda Farg‘ona viloyati IIB matbuot xizmati xabar bermoqda.

Ma’lum bo‘lishicha, Toshloq tumani IIB profilaktika inspektori katta leytenant A.U. 5 dekabrda tungi xizmatdan chiqib, tuman IIBda o‘tkazilgan ertalabki yo‘riqnomaga kelmagan, u bilan bog‘lanishning imkoni bo‘lmagan.

Surishtiruv ishlari davomida katta leytenant A.U. yashash xonadonidan taxminan 3 km uzoqlikdagi Besarang qishlog‘i hududidan oqib o‘tuvchi Katta Farg‘ona kanali yoqasidagi yo‘lning chetida, o‘ziga tegishli bo‘lgan “Spark” avtomobilida, o‘ziga biriktirilgan PM tabel quroli bilan bosh qismidan jarohatlangan, koma holatda topilgan va zudlik bilan tibbiy muassasaga joylashtirilgan.

Aniqlanishicha, xodim “1xbet” ilovasidan foydalanib, shu yil avgust oyida 45 mln so‘m yutqazgan. Uning qarzdorlik muammosi hal etilib, intizomiy tartibda jazolangan hamda viloyat IIB qoshidagi Intizomiy kengashning nazoratida bo‘lgan.

Hozirda holat viloyat prokuratura organlari tomonidan o‘rganilmoqda.

Farg‘ona viloyat IIBning qayd etishicha, respublika kesimida qimor o‘yinlari bo‘yicha ma’muriy huquqbuzarliklar soni 2019 yilda 1 454 tani tashkil etgan bo‘lsa, 2022 yilning 6 oyida 2 325 taga yetgan. Bu o‘yinlarni tashkil etish bilan bog‘liq jinoyatlar 2019 yilda 55 ta bo‘lsa, 2022 yilning 6 oyida 90 tadan oshgan.

#IIB #suitsid #bukmekerlik