Америкалик баскетболчи Бриттни Грайнер ва адвокат Пол Уиланни озод қилиш бўйича музокаралар чоғида Россия Германияда Тиргартендаги қотиллик иши бўйича судланган Вадим Красиковни экстрадиция қилишни сўради. Бу ҳақда АҚШ Миллий хавфсизлик кенгаши вакили Жон Кирби 11 декабрь, якшанба куни Американинг ABC телеканали эфирида айтиб ўтди.
«Улар (Россия томони вакиллари) Германияда қамоқда ўтирган қотилни экстрадиция қилишни сўрашган», — деди Кирби. Унинг қўшимча қилишича, Қўшма Штатлар бу таклифни жиддий деб ҳисобламади, чунки Вашингтон маҳкумнинг бошқа давлатда жазо ўтаётгани масаласига аралаша олмайди.
Вадим Красиков Германияда 2021 йил охирида чеченистонлик собиқ дала қўмондони Зелимхон Хонқошвилини ўлдирганликда айбланиб, умрбод қамоқ жазосига ҳукм қилинган эди. Берлин Олий суди прокурорнинг Красиков жиноятни Россия расмийларининг кўрсатмаси билан содир этгани ҳақидаги даъвосини исботланган деб топди. Хонқошвили 2019 йил 23 август куни Берлиндаги Кичик Тиргартен боғида отиб ўлдирилган.
Россия Бриттни Грайнер ва Пол Уиланни алмаштириш битимига Вадим Красиковни қўшишга уринаётгани ҳақида Американинг CNN телеканали июль ойида манбаларга таяниб хабар берди. ОАВ маълумотларига кўра, Россия томони бу таклифни махсус хизматларнинг норасмий каналлари орқали етказган. АҚШда Москва билан келишув муҳокамаси тафсилотлари ошкор этилмаган, бироқ август ойида Оқ уй Россия расмийларидан маҳбусларни алмашиш таклифига «маккор» жавоб олганини маълум қилганди.
Декабрда Бриттни Грайнер АҚШда қурол савдоси учун қамалган Россия фуқароси Виктор Бутга алмаштирилди. Грайнер Россияда гиёҳванд моддалар контрабандаси ва уни сақлашда айбдор деб топилди. Август ойида Россия суди уни тўққиз йилга озодликдан маҳрум этиш ва 1 миллион рубл миқдорида жаримага тортиш ҳақида қарор чиқарди.
