AQSh: Rossiya Xonqoshvilining qotilini amerikaliklarga almashtirishni muhokama qilgan

Amerikalik basketbolchi Brittni Grayner va advokat Pol Uilanni ozod qilish bo‘yicha muzokaralar chog‘ida Rossiya Germaniyada Tirgartendagi qotillik ishi bo‘yicha sudlangan Vadim Krasikovni ekstraditsiya qilishni so‘radi. Bu haqda AQSh Milliy xavfsizlik kengashi vakili Jon Kirbi 11 dekabr, yakshanba kuni Amerikaning ABC telekanali efirida aytib o‘tdi.

«Ular (Rossiya tomoni vakillari) Germaniyada qamoqda o‘tirgan qotilni ekstraditsiya qilishni so‘rashgan», — dedi Kirbi. Uning qo‘shimcha qilishicha, Qo‘shma Shtatlar bu taklifni jiddiy deb hisoblamadi, chunki Vashington mahkumning boshqa davlatda jazo o‘tayotgani masalasiga aralasha olmaydi.

Vadim Krasikov Germaniyada 2021 yil oxirida chechenistonlik sobiq dala qo‘mondoni Zelimxon Xonqoshvilini o‘ldirganlikda ayblanib, umrbod qamoq jazosiga hukm qilingan edi. Berlin Oliy sudi prokurorning Krasikov jinoyatni Rossiya rasmiylarining ko‘rsatmasi bilan sodir etgani haqidagi da’vosini isbotlangan deb topdi. Xonqoshvili 2019 yil 23 avgust kuni Berlindagi Kichik Tirgarten bog‘ida otib o‘ldirilgan.

Rossiya Brittni Grayner va Pol Uilanni almashtirish bitimiga Vadim Krasikovni qo‘shishga urinayotgani haqida Amerikaning CNN telekanali iyul oyida manbalarga tayanib xabar berdi. OAV ma’lumotlariga ko‘ra, Rossiya tomoni bu taklifni maxsus xizmatlarning norasmiy kanallari orqali yetkazgan. AQShda Moskva bilan kelishuv muhokamasi tafsilotlari oshkor etilmagan, biroq avgust oyida Oq uy Rossiya rasmiylaridan mahbuslarni almashish taklifiga «makkor» javob olganini ma’lum qilgandi.

Dekabrda Brittni Grayner AQShda qurol savdosi uchun qamalgan Rossiya fuqarosi Viktor Butga almashtirildi. Grayner Rossiyada giyohvand moddalar kontrabandasi va uni saqlashda aybdor deb topildi. Avgust oyida Rossiya sudi uni to‘qqiz yilga ozodlikdan mahrum etish va 1 million rubl miqdorida jarimaga tortish haqida qaror chiqardi.