Senegaldagi YTHda 40 kishi halok bo‘ldi

40 kishi halok bo‘lgan avtobuslar to‘qnashuvi ortidan Senegal prezidenti uch kunlik motam e’lon qildi.

Foto: AP

Senegalda 8 yanvar, yakshanba kuni sodir bo‘lgan YTHda 40 kishi halok bo‘ldi, 87 kishi jarohat oldi. G‘arbiy Afrikaning ushbu davlati prezidenti Maki Sal Twitter'da halok bo‘lganlarning yaqinlariga hamdardlik bildirdi, jarohatlanganlarga sog‘ayishini tiladi va 9 yanvardan Senegalda uch kunlik motam e’lon qildi.

Rasmiy ma’lumotlarga ko‘ra, N1 trassasida 70 ga yaqin yo‘lovchi bo‘lgan ikkita avtobus to‘qnashib ketgan. Hodisa avtobuslardan birining g‘ildiragi yorilib ketishi, natijada u qarama-qarshi yo‘lga chiqib ketgani sababli sodir bo‘lgan.

AFP agentligining ta’kidlashicha, Senegalda yo‘llarning yomon ahvoli, shuningdek, aholi o‘rtasida avtomobillarning qoniqarsiz holati tufayli avtohalokatlar keng tarqalgan muammo hisoblanadi.