«Hududgaz Qashqadaryo» filiali mas’ullari «metan zapravka»larga gazdan noqonuniy foydalanishda yordam bergani aniqlandi

Bosh prokuratura departamenti Qashqadaryo viloyat boshqarmasi «O‘zneftgazinspeksiya» viloyat bo‘limi xodimlari bilan hamkorlikda o‘tkazilgan tergovga qadar tekshiruvlarda, «Hududgaz Qashqadaryo» filiali mas’ul shaxslari ikkita «metan zapravka»ga gazdan noqonuniy foydalanishda yordam bergani aniqlangan.

Jumladan, «Hududgaz Qashqadaryo» filiali mas’ul shaxslari va boshqalar «T.» MChJga qarashli «metan zapravka» gaz hisoblash uskunasiga tashqi ta’sir o‘tkazish orqali 3,5 mlrd so‘mlik tabiiy gazdan noqonuniy foydalanilgani aniqlangan.

Shuningdek, «G.T.» xususiy korxonasi va «Hududgaz Qashqadaryo» filiali mas’ul shaxslari korxonaga qarashli «metan zapravka»da o‘lchov tarmog‘ining muhriga o‘zboshimchalik bilan shikast yetkazib, gaz qurilmasini boshqa qurilmaga almashtirish orqali 2,9 mlrd so‘mlik tabiiy gazdan noqonuniy foydalangani aniqlangan.

Qayd etilishicha, mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.