Turkiyada yana ikki zilzila. Yangi vayrongarchiliklar haqida xabar qilingan

Dushanba kuni kechqurun Turkiya janubida ro‘y bergan yana ikki yer silkinishi oqibatida olti kishi halok bo‘lgan va qariyb 300 kishi tan jarohati olgan. 

Mamlakat ichki ishlar vaziri Sulaymon Soylu jabrlangan hududlar aholisini avvalgi zilzilalardan shikastlangan binolarga qaytib kirmaslikka chaqirgan.

Turkiya janubida, fevral oyi boshida kuchli zilzilalar ro‘y bergan hududda dushanba kuni navbatdagi yer silkinishlari kuzatildi. Ikkita yangi zilzila kuchi 6,4 va 5,8 ballni tashkil etgan.

Turkiya favqulodda vaziyatlar agentligi birinchi zilzila mahalliy vaqt bilan soat 20:04 da (Toshkent vaqti bilan soat 22:04) qayd etilgani, ko‘p o‘tmay ikkinchi marta yer qimirlaganini ma’lum qilgan.

Zilzila epimarkazi O‘rta Yer dengizi sohilidagi Samandag shahri yaqinida joylashgan. Yer silkinishlari Turkiyaning qo‘shni viloyatlari, Suriya shimoli, Misr va Livanda ham sezilgan.

So‘nggi rasmiy ma’lumotlarga ko‘ra, mamlakatda bu safargi zilzila qurbonlari soni kamida olti nafarni tashkil etmoqda, 294 kishi tan jarohati olgan. 

Turkiya sog‘liqni saqlash vaziri Faxriddin Xo‘janing ma’lumotiga ko‘ra, yaralanganlarning 18 nafari og‘ir ahvolda va ular Adana va Dyortyo‘l shaharlaridagi shifoxonalarga joylashtirilgan.

Soyluning so‘zlariga ko‘ra, Antakya, Samandag va Dafna shaharlarida qurbonlarning jasadlari aniqlangan.

Qo‘shni Suriyada yangi zilziladan keyingi qurbonlar va jarohatlanganlar soni ochiqlanmagan. Suriya inson huquqlari markazi (SOHR) ma’lumotlariga ko‘ra, kamida 470 kishi, hukumat nazoratidagi hududlarda 320 va isyonchilar nazoratidagi shimoli-g‘arbiy Suriyada 150 kishi jabrlangan. Vahima va tiqilinch vaqtida kamida to‘rt kishi halok bo‘lgani aytilgan.

«Oq dubulg‘alilar» insonparvarlik tashkiloti avvalgi zilzila chog‘ida shikastlangan binolar qulab tushganini ma’lum qildi.

Guvohlar Reuters agentligiga Hatay viloyatidagi Antakya shahrida binolar shikastlanishi bilan bog‘liq holatlar qayd etilganini aytishgan - bu 6 fevral kuni ro‘y bergan va Turkiyada 44 mingdan ortiq kishi hayotiga zomin bo‘lgan oldingi zilzilalardan eng ko‘p jabrlangan hudud hisoblanadi.

Shundan buyon Turkiya hukumati 6 mingdan ortiq aftershoklarni qayd etishgan, ammo hududda bo‘lib turgan BBC jurnalistlari dushanba kungi yer silkinishi oldingilaridan ancha ko‘p bo‘lganini ta’kidlashdi.

Hozircha yangi zilzilalar oqibatidagi vayrongarchiliklarning haqiqiy ko‘lami va qurbonlar bo‘yicha yakuniy ma’lumotlar yo‘q.

Hatay viloyatining Iskandarun shahridagi yirik shifoxonalar bemorlar evakuatsiyasi haqida e’lon qilgan.

Antakya shahri meri ayrim odamlar xarobalar ostida qolib ketgani haqida xabar bergan.

Mahalliy aholi vakili Muna al-Umar Reuters  agentligiga Antakya markazidagi palata lagerida yashayotganini aytgan. «Men oyog‘im ostidagi yer yoriladi deb o‘yladim. Yana aftershoklar bo‘larkanmi?» deya yig‘laydi va yetti yoshli o‘g‘lini bag‘riga mahkam bosadi.

AFP jurnalisti Antakyadagi yangi zilzilalar tufayli osmonga chang buluti ko‘tarilganini aytadi. Agentlik ma’lumotiga ko‘ra, avvalgi zilzilalar chog‘ida jabrlangan bir necha bino devorlari qulab tushgan. Tibbiy yordamga muhtoj bo‘lgan yaradorlar bor.

Turkiyaning favqulodda vaziyatlar bo‘yicha agentligi (Afad) tvitter sahifasida dengiz suvi ko‘tarilishi xavfi tufayli sohilga yaqinlashmaslik so‘ralgan xabar paydo bo‘ldi, ammo keyin bu tvit o‘chirib yuborilgan.