Qashqadaryoda hokim yordamchisi 162 million so‘mni talon-toroj qilib, 114 millionlik soliqlarni to‘lashdan bo‘yin tovladi

Korrupsiyaga qarshi kurashish agentligi o‘tkazgan o‘rganishlarga ko‘ra, Qashqadaryo viloyatida oilaviy tadbirkorlik dasturi doirasida 2022 yilda ajratilgan imtiyozli kredit mablag‘lari talon-toroj qilingan hamda maqsadsiz ishlatilgan. Agentlik matbuot xizmatining ma’lum qilishicha, o‘rganish natijasida to‘plangan hujjatlar bo‘yicha Bosh prokuratura huzuridagi Iqtisodiy jinoyatlarga qarshi kurashish departamenti bilan hamkorlikda tadbirlar amalga oshirildi.

Departamentning Shahrisabz tuman bo‘limi tomonidan o‘tkazilgan tergovga qadar tekshiruv natijasi bo‘yicha «B.S.B.» MChJ ta’sischisi va rahbari A.T. – bir paytning o‘zida Shahrisabz tumanidagi mahallalardan birida hokim yordamchisi lavozimida ishlagan. U o‘z lavozimidan foydalanib 114 mln so‘m soliq va yig‘imlarni to‘lashdan qasddan bo‘yin tovlagani hamda tijorat bankining Shahrisabz filiali mansabdor shaxslari bilan jinoiy til biriktirgan holda hujjatlarni soxtalashtirish orqali 162 mln so‘m kredit mablag‘larini o‘zlashtirish yo‘li bilan talon-toroj qilgani aniqlangan.

Mazkur holat bo‘yicha hokim yordamchisiga nisbatan Jinoyat kodeksining 184-moddasi 2-qismi «B» bandi (soliqlar yoki yig‘imlarni to‘lashdan bo‘yin tovlash), 167-moddasi 3-qismi «a» bandi (o‘zlashtirish yoki rastrata yo‘li bilan talon-toroj qilish) va 209-moddasi 1-qismi (mansab soxtakorligi) bilan hamda bir tijorat bankining Shahrisabz filiali mansabdor shaxslariga nisbatan 167-moddasi 3-qismi «a» bandi va 228-moddasi 2-qismi «B» bandi (Hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilgan. Hozirda tergov harakatlari olib borilmoqda.