Bosh prokuratura huzuridagi Iqtisodiy jinoyatlarga qarshi kurashish departamentining Marg‘ilon shahar bo‘limi tomonidan tergovga qadar tekshiruv o‘tkazildi.
Unda Toshloq tumani kambag‘allikni qisqartirish va bandlikka ko‘maklashish bo‘limi sobiq boshlig‘i M.B. «Konizar» MFY hokim yordamchisi I.K.ning tavsiyasi asosida ajratilgan imtiyozli kredit mablag‘larining maqsadli sarflanishini o‘rganish maqsadida noqonuniy tekshiruv tashkil qilgani aniqlangan.
Ma’lum qilinishicha, M.B. tekshiruv natijasida aniqlangan kamchiliklar yuzasidan chora ko‘rmaslikni va’da qilib, buning evaziga hokim yordamchisidan 600 AQSh dollari olgan.
Shuningdek, sobiq mansabdor o‘z vakolatini suiiste’mol qilgan holda turli bahonalar bilan I.K.ning yana 17 mln so‘mini firibgarlik yo‘li bilan qo‘lga kiritgani aniqlangan.
Tekshiruv davomida ushbu mablag‘ning 10 mln so‘mi qaytarilishi protsessual tartibda rasmiylashtirilgan.
Mazkur holat yuzasidan Jinoyat kodeksining 168-moddasi - firibgarlik bilan jinoyat ishi qo‘zg‘atilib, hozirda tergov harakatlari olib borilmoqda.
