Prezident Shavkat Mirziyoyev huzurida kambagʻallikni qisqartirish yuzasidan yigʻilish boʻlib oʻtmoqda.
Yigʻilishda kredit, subsidiya va kompensatsiya shartlarini farmon va qarorlar bilan belgilash amaliyotidan voz kechilishi maʼlum qilindi.
Endi Iqtisodiyot vazirligi va Markaziy bank hududlar salohiyatidan kelib chiqib, moliyalashtirish mexanizmlarini har chorakda yangilab boradi.
Tuman shtablari mahallalardagi hokim yordamchilarini “loyihabay” ishlash tizimiga oʻtkazadi.
Buning uchun 8992 ta mahalladagi hokim yordamchilari vazifa bajaruvchi etib tayinlanadi, fidoyi va tashabbuskor kadrlar lavozimiga qayta tayinlanib, ishiga noloyiqlar yangilanadi.
Mutasaddilarga ikki oyda oʻquv markazi tashkil etib, xorijdan mutaxassislar jalb qilish vazifasi qoʻyildi. Ushbu markazda hokim yordamchilari “loyihabay” ishlashga oʻqitiladi.
Viloyat shtablari yil yakunida har bir tumandan eng yaxshi ikki nafar hokim yordamchisini Xitoy, Yaponiya va Turkiyaga malaka oshirishga yuboradi.
Eng namunali hokim yordamchilariga alohida malaka darajasi berilib, 50 foizgacha ustama toʻlanadi.
Mahalla bankirlarini ham shu tartibda oʻqitish va ularning xorijiy stajirovkasini tashkil etish topshirildi.
Bosh prokuraturaga bankirlar va hokim yordamchilarining mustaqil qaror qabul qilishiga toʻsqinlik qilayotgan omillarni bartaraf etishga koʻmaklashish vazifasi belgilandi.
Joylardagi tadbirkorlik infratuzilmasi loyihalarini yuritish tizimi ham qayta koʻrib chiqiladi.
Hozir bu masalalar asosan viloyat darajasida hal qilinayotgani ishlarning choʻzilishiga sabab boʻlayotgani qayd etildi.
Tumanni loyihalarning buyurtmachisiga aylantirish va mablagʻlarni bevosita joylarga yoʻnaltirish ishlarni tezlashtirishi taʼkidlandi. Ogʻir mahallalarda ish oʻrni yaratishga qaratilgan mahalliy mablagʻlarga respublikadan 2-3 karra koʻp resurs qoʻshib berish taklif qilindi.
Endi tadbirkorlik infratuzilmasi uchun tumanga beriladigan mablagʻlar hisobidan loyiha ishlab chiqishga tuman shtabi rahbari masʼul boʻladi.
