«Real» Jironadagi fiaskodan keyin alamini «Almeriya»dan oldi, qatorasiga uch turda gol ura olmagan Benzema bu o‘yinning birinchi bo‘limidayoq het-trik rasmiylashtirdi. Fransuz hujumchisi birinchi va ikkinchi gollarni Vinisius Junior va Rodrigoning qanotdan uzatmalari evaziga urdi, bo‘lim oxirida esa Lukas Vaskes ishlagan penaltini aniq ijro etdi.
Shunday qilib «Oltin to‘p» sohibi chempionatdagi gollari sonini 236 taga yetkazib, la liga to‘purarlari ro‘yxatida to‘rtinchi o‘ringa ko‘tarildi. U Madrid jamoasining 80-yillardagi afsonasi — meksikalik Ugo Sanchesni ortda qoldirdi. Oldinda — Sarra (253), Krishtianu Ronaldu (311) va Messi (473). Benzema shu sur’atda davom etsa, «Atletik»ning o‘tgan asr o‘rtalaridagi yulduzini ortda qoldirishi tayin. Karim Sarra bilan oradagi farqni shu o‘yindayoq qisqartirishi mumkin edi, ammo ikkinchi bo‘limda VAR aralashuvidan keyin Benzema tomonidan hujumda fol qayd etilib, bosh hakam belgilagan penalti bekor qilindi, uning so‘nggi daqiqalardagi zarbasi esa darvoza ustuniga tegdi.
Bu o‘yinda Vinisius ham alohida e’tiborga loyiq o‘yin ko‘rsatdi. Bir tomondan, braziliyalik futbolchi yana hissiyotlarini tiyib tura olmadi va unga sariq kartochka ko‘rsatildi. Agar arbitr uning sarkazm bilan yo‘llagan olqishini e’tiborsiz qoldirmaganida, u maydondan chetlatilishi ham mumkin edi. Ammo hakamlar yulduz futbolchilarni ayashadi, Vinining maqomini esa uning statistikasi ham tasdiqlaydi: ushbu yosh braziliyalik qatorasiga ikkinchi yil barcha turnirlar hisobga olingan holda gol+pas tizimida 20 talik nuqtani zabt etdi (20 gol va 20 golli uzatma).
Barselona – ter Stegen, Kunde, Kristensen (Alonso, 59), Arauxo, Balde, Buskets, de Yong (Fati, 59), Pedri (Kessie, 73), Gavi (Yamal, 83), Rafinya (Dembele, 73), Levandovski.
Betis – Ruy Silva, Montoyya, Pesselya, Luis Felipe (Edgar Gonsales, 12), Miranda (Xoakin, 64), Kanales (Xuanmi, 75), Vilyam Karvalyu, Rodriges, Peres (Abner, 64), Luis Enrike (Akuoku, 46), Villian Joze.
Ogohlantirish: Gonsales (24).
Chetlatish: Gonsales (33).
«Barselona» ham hafta o‘rtalaridagi aybini yuvdi, bu o‘yindagi kuchli startni himoyachilar ta’minlashdi. Safga endigina qaytgan Kristensen Rafinyaning o‘ng qanotdan bergan uzatmasini boshi bilan darvozaga joylab, kataloniyaliklar safidagi ilk golini nishonladi, «Rayo Valekano»ga qarshi o‘yinda muvaffaqiyatsiz o‘ynagan Kunde esa Levandovskiga ideal darajadagi pas uzatdi. Bu bilan polshalik hujumchiga turnir to‘purarlari ro‘yxatida yana Benzemadan oldinga chiqib olishda yordam berdi.
«Betis» esa muammolar girdobida qoldi, jamoada o‘yin boshlanishidan ham muammolar yetarli edi. Manuel Pellegrini bu o‘yinda Fekir va Kanales kabi yetakchilariga tayana olmasdi, zarbdor forvard Borxa Iglesias jarohat olgandi, «Barsa»ning birinchi goli arafasida esa markaziy himoyachi Luiz Felipe ham safdan chiqdi.
Uni almashtirgan Edgar Gonsales esa juda yomon o‘yin ko‘rsatib, to‘qqiz daqiqa ichida ikki bor sariq kartochka oldi. Mehmonlarni VAR ayamadi, bosh hakam avvaliga Rafinyaning golini ofsayd tufayli bekor qilgandi, videotakror aralashuvidan keyin esa hisob 3:0 ko‘rinishiga keldi. Yashil-oqlar muxlislari uchun bu o‘yindagi yagona ijobiy lahza 41 yoshli Xoakinning zaxiradan tushishi bo‘lgandi. Yaqinda mavsum oxirida futbolchilik faoliyatini yakunlashini e’lon qilgan ushbu faxriy futbolchini ko‘k-anorranglilar jamoasi muxlislari ham olqishlashdi.
Ammo o‘yin oxirlarida uni yana olqishlar ostida kuzatib qo‘yishga to‘g‘ri keldi - u jarohat olib maydonni tark etdi, barcha almashtirishlardan foydalanib bo‘lingani tufayli qolgan vaqtda mehmonlar 9 kishi bo‘lib o‘ynashiga to‘g‘ri keldi. Agar futbolchining jarohati jiddiy bo‘lib chiqsa, u Ispaniya chempionatida 622 o‘yin o‘tkazgan «Barselona» sobiq darvozaboni Subisarretaning rekordini yangilay olmaydi. Bu natijaga erishish uchun «Betis» havbeki qolgan barcha tur o‘yinlarida maydonga tushishi talab etiladi.
Ammo, bu oqshom «Kamp Nou» bo‘lajak yulduzning ilk o‘yiniga guvoh bo‘lgan bo‘lishi mumkin — Lamin Yamal. U jamoaning Ispaniya chempionatidagi eng yosh debyutantiga aylandi. 15 yoshli bolakay o‘yin oxirida ilk golini urishi ham mumkin edi, ammo uning zarbasi darvozabon tomonidan to‘sildi, u shuningdek yanvar oyidan buyon o‘ynamagan Dembele uchun qulay vaziyat yaratib berdi.
Italiya: Milanning qasosi
A Seriya. 32-tur
Roma — Milan 1:1
Gollar: Abraham (90+3) — Salemakers (90+7).
Roma – Patrisiu, Chelik, Manchini, Kumbula (Bove, 15; Kamara, 89), Rojyer, Spinatssola, Matich, Kristante, Pellegrini, Belotti (Al-Sha’roviy, 46), Abraham (Solbakken, 90+8).
Milan – Menyan, Kalabriya, Ker (Kalulu, 73), Tomori (Tiav, 46), Ernandes, Krunich, Binnosir (de Ketelare, 73), Dias (Salemakers, 56), Tonali, Leau, Jiru (Origi, 88).
Ogohlantirishlar: Tomori (15), Matich (24), Rojyer (71), Krunich (75), Kristante (83).
«Yuventus»ga o‘n besh ochkosi qaytarib berilishi shunga olib keldiki, o‘zini qulay his qilib turgan «Roma» va «Milan»ning o‘zaro o‘yini haqiqiy jangga aylandi. O‘yindagi deyarli har bir epizodda keskinlik ko‘rinib turdi.
Bu o‘yin vaqtiga ham ta’sir ko‘rsatdi, birinchi bo‘lim 50 daqiqa davom etdi, ikkinchi bo‘lim kechikib boshlandi. Jamoalar o‘yinni davom ettirishga hozirlik ko‘rayotganida Belottini almashtirish talab etilishi ma’lum bo‘ldi. O‘yinning oxirgi qismi esa yanvar oyida «San-Siro»da kuzatilgan trillerni ham soyada qoldirdi. O‘shanda yaxshiroq o‘ynagan «Milan» so‘nggi daqiqalarda ikki gol o‘tkazib yuborgan (2:2) va inqiroz ko‘chasiga kirib qolgandi.
O‘sha o‘yinda «Roma»ga durangni Abrahamning goli olib kelgandi, ingliz hujumchisi shanba oqshomida ham qo‘shib berilgan uchinchi daqiqada to‘pni darvoza to‘riga joyladi. Ammo Stefano Pioli baribir qasos oldi, o‘yinga qo‘shib berilgan oxirgi daqiqada Rafaela Leau o‘z qanotidan to‘pni Salemakersning oyog‘iga uzatib berdi. G‘alabani nishonlashga tayyor bo‘lib turgan Joze Mourino va uning jamoasi hamon beshinchi o‘rinda qolmoqda.
Germaniya: Leverkuzen omili
Leypsig – Hoffenhaym 1:0
Gol: 1:0 – 28 Nkunku.
Union – Bayyer 0:0
Kyoln – Frayburg 0:1
Gol: 0:1 – 54 Doan.
Bundesligada eng qizig‘i yakshanba kuni boshlanadi, chunki juma kuni Bohumda ochko yo‘qotgan Dortmundning «Borussiya» klubi (1:1) «Bavariya»ga birinchi o‘ringa qaytish imkonini berdi. Shanba kungi barcha intrigalar esa YeChLga ikki yo‘llanma uchun kurashayotgan uch da’vogarning sirtqi kurashi bilan bog‘liq edi.
«Bayyer» asosiy yevrokubok yo‘llanmasi uchun kurashmayapti, ammo 14 o‘yindan iborat mag‘lubiyatsiz seriya qayd etgan leverkuzenliklar boshqalarning asabiga o‘ynamoqda. Bir tur avval Xabi Alonso shogirdlari «Leypsig»ni mag‘lub etgandi, endi esa «Union»ni ikki ochkodan mahrum etdi. Natijada uchinchi o‘rinda qolgan berlinliklar faqat to‘plar nisbatiga ko‘ra «Frayburg»dan oldinda joylashgan, bu jamoa bir mavsumda to‘plangan ochkolari soni bo‘yicha o‘z rekordini o‘rnatib bo‘ldi (56). Kyolnda bu jamoaga burchak zarbasidan to‘pni uzoq ustun oldidagi Doenga yetkazib bergan Heler g‘alaba keltirdi.
«Leypsig» esa hamon kuchli to‘rtlik uchun poygadagi autsayder bo‘lib qolmoqda. Oxirgi turlarda yo‘qotishlarga uchragan jamoaning «Hoffenhaym» bilan o‘yindagi g‘alabasi Nkunku jamoa uchun naqadar muhimligini ko‘rsatib berdi. O‘tgan mavsumning eng yaxshi futbolchisi bu mavsumda jarohatlardan aziyat chekmoqda, uning shanba kungi goli — noyabr oyidan buyon birinchisi bo‘ldi, o‘shanda fransuz mavsumdagi ikki jarohatidan birinchisini olgandi, bu esa uning JCh-2022 turniridan qolib ketishiga sabab bo‘lgandi.
Kun statistikasi
«Rayo Valekano» peshqadam «Barselona»ni yenganidan (2:1) uch kun o‘tib so‘nggi o‘rindagi «Elche»ga yirik hisobda mag‘lub bo‘ldi (0:4).
Shanba kuni «Vest Hem» «Kristal Pelas»ga qarshi o‘yinda (3:4) burchak jarima zarbasidan keyin 3 gol urdi. Angliya chempionatida bunaqasi 2019 yil martidan buyon kuzatilmagandi.
«Brentford» hujumchisi Touni top-5 ligalarda kamida 20 gol urgan 7-futbolchi bo‘ldi. Bungacha bu natija Holand («Manchester Siti»), Keyn («Tottenhem»), Osimhen («Napoli»), Mbappe («PSJ»), Devid («Lill») va Lyakazett («Lion») tomonidan zabt etilgandi.
«Shtutgart» bosh murabbiylikka Sebastyan Heness tayinlanganidan buyon 8 ochko jamg‘ardi. U to‘rt o‘yinda mag‘lubiyatga uchramasdan, o‘zidan oldingi murabbiy Bruno Labbadiya 13 turda to‘plagan ochkolardan ko‘proq ochko jamg‘argan.
Fransiya chempionatining joriy mavsumida «Lill» yarimhimoyachisi Kabella 9 gol urdi. Bu uning shaxsiy rekordi.
«Brayton» futbolchilari dastlabki o‘n besh daqiqalikda 12 gol urishgan, bu APLdagi eng yaxshi ko‘rsatkich.
