Raqobat qo‘mitasi «Biz sizni eshitamiz» loyihasini amalga oshiradi

Prezident tomonidan “Ma’muriy islohotlar doirasida raqobatni rivojlantirish va iste’molchilar huquqlarini himoya qilish sohasida davlat boshqaruvini samarali tashkil qilish chora-tadbirlari to‘g‘risida”gi farmon imzolandi.

Raqobatni rivojlantirish va iste’molchilar huquqlarini himoya qilish qo‘mitasi monopoliyaga qarshi respublika organi bo‘lib, o‘z faoliyatida bevosita prezidentga va Senatga hisobdor hisoblanadi, o‘z vakolatlarini davlat organlari va tashkilotlaridan mustaqil ravishda amalga oshiradi.

2023 yil 1 oktyabrdan:

• eksklyuziv huquqlar berilgan xo‘jalik yurituvchi sub’yektlarning reyestri (ro‘yxati) joriy etiladi va ushbu reyestrni yuritish hamda xo‘jalik yurituvchi sub’yektlar tomonidan kamsitmaslik shartlariga rioya etilishi ustidan nazorat Raqobat qo‘mitasiga yuklatiladi;
• Raqobat qo‘mitasi bitim shartlarini, tovarlar realizatsiya qilinadigan hududni va narxni belgilashga bir tomonlama ta’sir ko‘rsatish imkoniyatiga (ustun muzokara kuchiga) ega bo‘lgan sub’yektlarni aniqlaydi va ular tomonidan ustun muzokara kuchini suiiste’mol qilishni taqiqlaydi;
• raqobatga qarshi kelishuvni tuzgan yoki o‘zaro muvofiqlashtirilgan harakatni sodir etgan yuridik yoki jismoniy shaxs bu haqda Raqobat qo‘mitasiga birinchi bo‘lib ixtiyoriy ravishda xabar qilsa, u raqobat to‘g‘risidagi qonun hujjatlarida belgilangan javobgarlikdan ozod etiladi;
• moliya va raqamli bozorda ustun mavqeni egallab turgan xo‘jalik yurituvchi sub’yektlar o‘zlarining rasmiy veb-saytlarida sotiladigan tovarlar (ishlar, xizmatlar)ning monopol turlari bo‘yicha namunaviy shartnomalarni (ofertalarni) joylashtiradi;
• asosiy faoliyati tabiiy monopoliya sharoitida tovar ishlab chiqarish yoki xizmat ko‘rsatish bo‘lmagan xo‘jalik yurituvchi sub’yektlar tabiiy monopoliyalar sohasida faoliyat olib borganda ular tabiiy monopoliya sub’yektlari hisoblanmaydi.

Raqobatga qarshi harakatlarga chek qo‘yishda iqtisodiy ta’siri past holatlar bo‘yicha birinchi marta huquqbuzarlik sodir etgan tadbirkorlik sub’yektlariga javobgarlik choralarini qo‘llamagan holda, profilaktik tushuntirish tadbirlari amalga oshiriladi.

Raqobat qo‘mitasi tomonidan "Biz sizni eshitamiz" loyihasi joriy qilinadi va loyiha doirasida har chorakda tadbirkorlar bilan uchrashuv o‘tkazish va raqobatga to‘siq bo‘layotgan omillarni bartaraf etish bo‘yicha takliflar ishlab chiqish tizimi yo‘lga qo‘yiladi.