“Tadbirkorlik faoliyati erkinligining kafolatlari to‘g‘risida”gi qonunga o‘zgartirishlar kiritildi.
Qonunning 30¹-moddasiga muvofiq, davlat tadbirkorlik sub’yektlariga nisbatan qonunchilikda belgilangan soliq va bojxona imtiyozlari, moliyaviy va boshqa turdagi imtiyozlar (moddiy shakldagi davlat tomonidan qo‘llab-quvvatlash choralari), shuningdek, preferensiyalar (nomoddiy shakldagi davlat tomonidan qo‘llab-quvvatlash choralari) to‘liq hajmda qo‘llanishini kafolatlaydi.
Davlat organlari va ularning mansabdor shaxslari tomonidan tadbirkorlik sub’yektlariga qonunchilik hujjatlarida belgilangan tartibda beriladigan imtiyoz va preferensiyalardan foydalanishni asoslantirmasdan rad etish, shuningdek, ulardan foydalanishga to‘sqinlik qilish taqiqlanadi.
Iqtisodiyot va moliya vazirligi tomonidan maxsus platformada tadbirkorlik sub’yektlariga beriladigan imtiyoz hamda preferensiyalarning turlari, muddatlari va tartibini o‘z ichiga olgan alohida reyestr yuritiladi.
Tadbirkorlik sub’yektlari uchun imtiyoz va preferensiyalar reyestrini shakllantirish va doimiy yangilab borish tartibi Vazirlar Mahkamasi tomonidan belgilanadi.
Davlat tomonidan tadbirkorlik sub’yektlariga beriladigan imtiyoz va preferensiyalar yakka tartibda (individual) emas, balki iqtisodiyot tarmoqlari, sohalar yoki hududlar kesimida belgilanadi. Bunda imtiyoz va preferensiyalar ochiq hamda shaffof mezonlar asosida barcha tadbirkorlik sub’yektlari uchun teng shartlarda qo‘llanishi shart.
Eksklyuziv huquq berilgan sub’yektlar ro‘yxati ochiqlanadi
Eslatib o‘tamiz, 18-avgust kuni davlat rahbarining tadbirkorlar bilan muloqotida biznesga bir qator yengilliklar e’lon qilindi. Elektr va gaz uchun oldindan to‘lov miqdori to‘lov intizomini buzmagan korxonalar uchun 100 foizdan 15 foizgacha pasaytirilishi, kichik biznes ustidan tekshiruvlarga 3 yillik moratoriy, moliyaviy jarimalar miqdori o‘rtacha ikki barobar kamaytirilishi va davlat xizmatlarida “sukut – rozilik” tamoyilining yo‘lga qo‘yilishi shular jumlasidan.
