Manturov: Rossiyada bir oyda o‘q-dori yetkazib berish hajmi o‘tgan yilgi umumiy ko‘rsatkichdan yuqori

«Deyarli barcha korxonalar, kamdan-kam holatlardan tashqari, vaqt va hajm bo‘yicha misli ko‘rilmagan jadvallarga amal qilyapti. Alohida uzilishlar tezda bartaraf etilyapti yoki shunga o‘xshash mahsulotlar bilan qoplanyapti», dedi Manturov. 

Uning so‘zlariga ko‘ra, 2023 yil boshidan beri ko‘plab turdagi qurollar, harbiy va maxsus texnikalar o‘tgan yilga nisbatan ancha ko‘p ishlab chiqarilgan, deb yozadi «Interfaks».

Avvalroq Vashington Qo‘shma Shtatlar tomonidan yetkazib berilgan kassetali o‘q-dorilar allaqachon Ukraina qurolli kuchlari tomonidan qo‘llanayotganini tasdiqlagandi. 

AQSh Milliy xavfsizlik kengashining strategik aloqalar bo‘yicha koordinatori Jon Kirbining so‘zlariga ko‘ra, Ukraina qurolli kuchlarining dastlabki baholashiga ko‘ra, kassetali o‘q-dorilardan «samarali va maqsadga muvofiq» foydalanilmoqda. Bu haqda Kirbi 20 iyul, payshanba kuni bo‘lib o‘tgan brifingda ma’lum qildi. 

Ukraina kassetali o‘q-dorilardan faqat dushman kuchini siqib chiqarish uchun foydalanishga va’da berdi, deb eslatadi Reuters.