Ars Technica nashri jurnalisti Erik Berger yangi maqolasida «Roskosmos» rahbari Dmitriy Bakanovning Rossiyada yaratilayotgan istiqbolli kosmik kema haqidagi bayonotiga eʼtibor qaratgan.
Bakanovning maʼlum qilishicha, 2026-yil kuzida Uzoq Sharqda kemani parashyut yordamida tashlash sinovlari oʻtkaziladi. Korporatsiya birinchi ekipajli parvozni 2028 yoki 2029-yilda amalga oshirishni koʻzlamoqda. Uchirish uchun, ehtimol, «Angara-A5M» raketasidan foydalaniladi.
Loyiha Yevropa bilan hamkorlikdan boshlangan
Qariyb yigirma yil avval Rossiya va Yevropa kosmik agentligi - ESA yangi avlod ekipajli kosmik kemasini birgalikda yaratish masalasini muhokama qila boshlagan.
Oʻsha paytdagi kelishuvlarga koʻra, Yevropa olti nafargacha odamni tashishga moʻljallangan kapsula uchun xizmat modulini taqdim etishi kerak edi.
Biroq keyinchalik Yevropa oʻz ekipajli kosmik kemasi ustida ishlashni davom ettirmaslikka qaror qilgan. «Roskosmos» esa loyihani mustaqil amalga oshirish yoʻlini tanlagan.
Kema bir necha bor qayta nomlangan
Loyiha shu vaqt ichida bir nechta nom bilan atalgan. Dastlab u «Istiqbolli ekipajli transport tizimi», keyin «Yangi avlod ekipajli transport kemasi» deb yuritilgan. Keyinchalik «Federatsiya», soʻng esa «Orel» nomini olgan.
Bergerning yozishicha, qariyb 20 yillik ishlanmalar davomidagi koʻplab nom oʻzgarishlari va kompyuterda tayyorlangan tasvirlarga qaramay, kema yaratilishida amalda qanday siljish boʻlayotgani noaniqligicha qolgan.
Bakanov eʼlon qilgan parashyut sinovlari esa loyiha boʻyicha navbatdagi amaliy qadam sifatida koʻrsatilmoqda.
Nega parvoz muddatiga shubha bildirilmoqda?
Amerikalik sharhlovchi 2028–2029-yillardagi parvoz sanasini hozirdan taqvimga kiritishga shoshilmaslik kerakligini taʼkidlagan.
U bundan toʻrt yil avval Rossiya prezidenti Vladimir Putin «Orel» kemasi va Rossiyaning Oy dasturi qayta tiklanishi haqida ishonch bilan gapirganini eslatgan. Bergerning bahosicha, oʻshanda aytilgan rejalar hali kutilgan natijani bermagan.
