DW xabariga koʻra, Yevropa Kengashi Parlament assambleyasi - PASE 30-sentabr kuni Strasburgda shu mazmundagi rezolyutsiyani qabul qilgan.
Hujjatda Rossiyaga qarshi ikki davlatlararo ish boʻyicha Inson huquqlari boʻyicha Yevropa sudi qarorlari asosida Ukrainaga kompensatsiya toʻlash uchun muzlatilgan aktivlardan foydalanishga chaqirilgan.
Assambleya Yevropa Kengashi shafeligida maxsus moliyalashtirish mexanizmini tashkil etishni tavsiya qilmoqda. Rossiyaning muzlatilgan aktivlari ushbu mexanizmga oʻtkazilib, sud belgilaydigan tovonlarni toʻlashga sarflanishi koʻzda tutilgan.
Gap qaysi sud ishlari haqida bormoqda?
Rezolyutsiyada Inson huquqlari boʻyicha Yevropa sudi Ukraina tashabbusi bilan koʻrib chiqilgan ikki davlatlararo ishda Rossiyani inson huquqlarining jiddiy buzilishi uchun javobgar deb topgani eslatilgan.
Birinchi ish Rossiya anneksiya qilgan Qrimdagi okkupatsion maʼmuriyat tomonidan inson huquqlarining buzilishiga taalluqli.
Ikkinchisi - «Ukraina va Niderlandiya Rossiyaga qarshi» ishi - Donbassda 2014-yildan boshlangan voqealar, jumladan, MH17 reysini bajarayotgan samolyotning urib tushirilishi hamda 2022-yil 24-fevralda boshlangan keng koʻlamli bosqin bilan bogʻliq.
Hujjatga koʻra, sud har ikki ishda huquqbuzarliklarning xususiyati va koʻlami Yevropa Kengashi tarixida misli koʻrilmaganini qayd etgan. Rossiyaning harakatlari tashkilotning asosiy qadriyatlari va xalqaro huquqiy tartib asoslariga zid deb baholangan.
«Ushbu ikki davlatlararo ish boʻyicha adolatli tovon miqdorini belgilash masalasi hali hal etilmagan boʻlsa-da, Ukrainaga yetkazilgan zarar koʻlamini hisobga olganda, tayinlanadigan summalar milliardlab, oʻnlab milliard yoki yuzlab milliard yevroga yetishi mumkin», - deyiladi rezolyutsiyada.
YEKPA deputatlari shu asosda Rossiyaning muzlatilgan davlat aktivlarini sud qarorlari boʻyicha kompensatsiya toʻlashga yoʻnaltirishni xalqaro huquqqa muvofiq «qonuniy qarshi chora» deb hisoblamoqda.
Rossiyaning boshqa ishlar boʻyicha qarzi ham bor
Rezolyutsiyada aytilishicha, Ukrainaning davlatlararo daʼvolari boʻyicha kompensatsiyalardan tashqari, Rossiyaning sud qarorlari asosida toʻlashi kerak boʻlgan qarzi kechiktirilgan toʻlovlar uchun foizlar bilan birga 3,3 mlrd yevrodan oshgan.
