Buxorodagi savdo majmuasida yuz bergan yong‘in oqibatida 23 ta do‘kon yonib ketdi

Favqulodda vaziyatlar vazirligi xabariga ko‘ra, 2023 yilning 1 avgust kuni soat 02:05 da viloyat FVB navbatchi dispetcherlik xizmatiga viloyat Milliy gvardiya xodimlari tomonidan qo‘l telefonidan qo‘ng‘iroq qilinib, Buxoro shahar Ibn Sino ko‘chasi yo‘l yoqasida joylashgan 2 qavatli savdo do‘konlari (xalq tilida eski PMK savdo majmuasi)da yong‘in sodir bo‘layotgani to‘g‘risida xabar berilgan.

Voqea joyiga viloyat garnizonidan 11 ta yong‘in-qutqaruv ekipajlari hamda 7 ta hamkorlikdagi xizmatlarning texnikalari jalb etildi. Yong‘in joyiga soat 02:07 da yetib borilgan, savdo do‘konlarining taxminan 700 kvadrat metr maydoni yonayotgani to‘g‘risida ma’lumot olingan va yong‘in soat 03:11 da batamom o‘chirilgan.

Yong‘in oqibatida Ibn Sino ko‘chasi yo‘li yoqasida joylashgan tadbirkorlik sub’yektlariga tegishli 2 qavatli 15 ta do‘konning ichki tovar mahsulotlari va shift qismi yongan bo‘lib, xuddi shu manzilda bo‘lgan Buxoro markaziy dehqon bozoriga qarashli 1 qavatli savdo pavilonidagi 8 ta savdo do‘koni (jami 23 ta savdo do‘koni) ichida bo‘lgan tovar moddiy boyliklari va do‘kon jihozlari yonib zarar ko‘rgan. Yong‘indan bozor tasarrufidagi pavilon va savdo do‘konlarining 10 000 kvadrat metr maydoni saqlab qolindi.

Yong‘in natijasida insonlarning halok bo‘lishi va tan jarohati olish holatlari qayd etilmagan.

Sodir bo‘lgan yong‘in yuzasidan viloyat IIB va FVB tomonidan tergovga qadar tekshiruv ishlari olib borilmoqda. Yong‘inning kelib chiqish sababini aniqlash maqsadida yong‘in-texnik ekspertizasi tayinlangan.

Voqea joyiga viloyat sektor rahbarlari, FVB, Milliy gvardiya boshqarma boshliqlari va boshqa mas’ul rahbarlar jalb etilgan.