«Bavariya» peshqadamga qarshi, Milanda derbi, «MYu» va «Real» uchun jiddiy sinov 

Kuchli beshlik chempionatlarida jami 6 jamoa yuz foizlik natija ko‘rsatib turibdi. Qizig‘i, ularning to‘rttasi shu hafta o‘zaro kuch sinashadi. Bundesliga peshqadamlari o‘rtasidagi bahs va Milan derbisi aynan shu jihati bilan e’tiborimizni qozonsa ajab emas. Demak, kamida ikki, balkim ko‘proq jamoa ushbu dam olish kunlarida ilk ochkosini yo‘qotadi. Kelasi haftadan yevrokuboklar ham start olishini inobatga olsak, oldimizda yana bir oylik futbol marafoni kutib turibdi.  

BAVARIYa – BAYYeR (15 sentabr, 23:30)

An’anaviy tarzda haftaning shanba kunlari chiqadigan anonsimiz bir kun oldin taqdim qilinganining asosiy sababi shu uchrashuvdir. Ayniqsa, «Bayyer»ning ushbu mavsum ko‘rsatayotgan o‘yinlari ko‘pchilikning e’tiboriga tushgan bo‘lsa ajab emas. Aslida Xabi Alonso jamoasi o‘tgan yili ham ko‘pchilikning tiliga tushgandi, ammo mavsum oxiriga kelib natijalar beqarorlashdi va jamoa Chempionlar ligasi yo‘llanmasini qo‘lga kirita olmadi. Ko‘pchilik endi jamoa yetakchilarining ketishi bilan bog‘liq pasayish ro‘y beradi deb kutganida esa klub asosiy yetakchilarini saqlab qolish bilan bir qatorda ancha foydali xaridlarga qo‘l urdi. Granit Jaka va Yonas Xoffmanlar jamoa o‘yiniga tajriba va salobat olib kirgan bo‘lishsa, Belgiyadan kelgan Viktor Oko Bonifase umuman Bundesliga kashfiyoti bo‘lib turibdi. Nigeriyalik 22 yoshli hujumchi 4 gol va 2 pas bilan umumiy ko‘rsatkichlar bo‘yicha liga peshqadami bo‘lib turibdi. «Bayyer» esa umuman, 3 turdan so‘ng eng ko‘p gol (11) urgan va eng kam (2) o‘tkazib yuborgan jamoadir. 

«Bavariya» bunday otilib chiqqan jamoalarni o‘z o‘rniga tushirib qo‘yish bo‘yicha mutaxassis, ammo bu ishini odatda mavsum o‘rtalari yoki oxirida amalga oshirar edi. Yaqinda superkubok bahsida myunxenliklar «Leypsig»ga yengilganini e’tiborga olsak, Tuxel shogirdlari hali to‘liq optimal formaga kirib olishgani yo‘q. Buning ustiga, kelasi hafta YeChL doirasida «Manchester Yunayted»ga qarshi o‘yin kutib turganini ham unutmaslik kerak. 

«Bayyer» bu stadionda o‘tgan mavsumda 0:4 hisobida yirik mag‘lubiyatga uchragan, ammo bahorda o‘tgan javob o‘yinida revash olgandi – 2:1. Umuman leverkuzenliklarning «Bavariya» maydonida uch ochko qo‘lga kiritishga muvaffaq bo‘lganiga ko‘p bo‘lgani yo‘q. 2019 yilda mehmonlar Leon Beylining dubli evaziga 2:1 hisobida g‘alabaga erishgan edi.  

MANCheSTeR YuNAYTeD – BRAYTON (16 sentabr, 19:00)  

Milliy jamoalar bilan bog‘liq tanaffusda kim-kim «Manchester Yunayted» muxlislari umuman zerikishmadi. Avvaliga Antoni bilan bog‘liq mojaro – Braziliyada futbolchiga ochilgan jinoyat ish sababidan u avval milliy jamoasidan, keyin esa «MYu» mashg‘ulotlaridan chetlatildi. Keyin Jyeydon Sanchoning ten Hag bilan mojarosi – murabbiy futbolchini tanqid qildi, futbolchi ijtimoiy tarmoqlar orqali javob qildi va uzr so‘ramoqchi emas. Natijada u ham vaqtincha umumiy guruhda shug‘ullanishdan chetda qoldi. Buyoqda Maguayrning navbatdagi avtogoli futbol jamoatchiligini qayta qo‘zg‘atib yubordiki, hatto himoyachining onasi ham bayonot berishga majbur bo‘ldi. Bularning hammasi Amad, Maynu, Maunt kabi o‘ng qanotda o‘ynashi mumkin bo‘lgan hamda Varan, Martines, Shou kabi markaziy himoyachilar jarohati fonida ro‘y berayotgani ten Hagga yana qo‘shimcha boshog‘rig‘i yuklayotgani shubhasiz. Martines hamda jamoaga yangi qo‘shilgan Amrabatning «Brayton»ga qarshi tayyor bo‘lish ehtimoli aytilayotgan bo‘lsa-da, yuqori sport formasida bo‘lmasliklari tabiiy. Buning ustiga Amrabat hali to‘liq tarkib bilan birorta mashg‘ulot o‘tkazib ulgurgani yo‘q. 

Ijobiy xabarlardan, nihoyat Rasmus Hoylund «Old Trafford»da to‘laqonli debyut qiladi. Hujumchi «Arsenal» bilan o‘yinda o‘ziga berilgan oz daqiqalarda ishonchli to‘p surganini ta’kidlash kerak. Shuningdek, Serxio Regilon ham katta ehtimol bilan chap qanotda paydo bo‘lishi kutilmoqda. Mehmonlar safida esa tizzadan jarohat tufayli Ensiso sheriklariga yordam bera olmasligidan tashqari, o‘tgan turda xet-trikka erishgan Evan Fergyusonning ishtirok etishi so‘roq ostida turibdi. 

Umuman olganda, ushbu uchrashuvning ayniqsa, taktik jihatdan qiziq tomoni bor – har ikki jamoa ham yuqori pressing bo‘yicha liganing eng kuchli jamoalari hisoblanadi. «Brayton» bu xususiyat bilan anchadan beri maqtana olsa, «MYu» ten Hag qo‘l ostida o‘zgaryapti – 4 turdan keyin raqib maydonida to‘pni olib qo‘yish ko‘rsatkichi bo‘yicha yetakchilik qilmoqda. Bundan tashqari, har ikki klub ham yuqori pressingga qarshi bild-ap bo‘yicha e’tiborga arziydi – «Brayton» umuman bu ko‘rsatkich bo‘yicha hatto Gvardiolaning havas qilishiga sabab bo‘lgan, «Yunayted» esa darvozaga Andre Onana kelgach, shu yo‘nalishda ancha odimladi. 

Yana bir fakt, «Manchester Yunayted» APL doirasida uch o‘yindan beri «Brayton»ga yutqazyapti. O‘tgan yili Angliya kubogi yarimfinalida ham jamoalar duch kelishgan, ammo hisob ochilmagandi. Erik ten Hag «MYu» boshqaruviga kelgach, qarshi maydonga tushgan barcha jamoa ustidan g‘alaba qozonishga muvaffaq bo‘lgan. APLda yenga olmagan «Nyukasl» Liga kubogi finalida mag‘lub etilgan. Birgina «Brayton» hamon ten Hag uchun chaqilmas yong‘oq bo‘lib qolmoqda.  

INTeR – MILAN (16 sentabr, 21:00)  

«Napoli» ajoyib mavsumdan keyin, buning ustiga yangi murabbiy qo‘l ostida biroz pasayishi kutilmoqda, «Yuventus» ham barcha muammolarini yechib ulgurgani yo‘q. Bu sharoitda Milan jamoalari yana chempionlik poygasida favoritga aylanib olishlari ko‘pchilik tomonidan taxmin qilinmoqda. Ularning mavsum boshida, hali birorta ochko yo‘qotmay turib to‘qnash kelishlari derbining yanayam murosasiz kechishiga sabab bo‘lsa ajab emas. 

«Inter» kuchli beshlikda hali to‘p ham o‘tkazib yubormagan yagona jamoa bo‘lib turibdi. Lekin ko‘k-qoralarning raqiblari biroz yengilroq bo‘lganini inobatga olsak, «Milan»ning natijalari ancha salmoqlidek tuyuladi. Tarkibga yangi qo‘shilgan Pulishich, Loftus-Chik kabi futbolchilar o‘yindagi asosiy figuralarga aylanib borayotganliklari ham ijobiy jihat. Pioli shogirdlari «Bolonya» va «Roma» kabi jamoalarni safarda yenga olgani jamoa salohiyatidan darak berib turibdi. Ayniqsa, 60-daqiqadan bir kishi kam bo‘lib qolgan milanliklar g‘alabani ushlab qolishning uddasidan chiqqani diqqatga sazovor. Darvoqe, o‘sha o‘yinda yetakchi markaziy himoyachi Fikayo Tomori maydondan chetlatilgan. Uning diskvalifikatsiya tufayli derbini o‘tkazib yuborishi rasmiy mehmonlarga yetarlicha muammo tug‘dirishi mumkin. 

O‘yin YeChL birinchi tur o‘yinlari oldidan bo‘layotgani ham murabbiylarga bor e’tiborni jalb qilish uchun xalaqit bersa kerak. Zero har ikki klub ham biroz murakkabroq guruhga tushib qolishdi va kelasi hafta 1-tur bo‘lsa-da, ko‘p narsani hal qiluvchi bahsda qatnashishadi. «Inter» Sosedadga safar qilsa, «Milan» umuman «o‘lim guruhi» a’zolaridan biriga aylandi va o‘sha kuni «San-Siro»da «Nyukasl»ni qabul qiladi. 

O‘zaro o‘yinlarga kelsak, o‘tgan mavsumda YeChL yarimfinalini ham qo‘shganda, jamoalar to‘rt marotaba to‘qnash kelishdi. «Inter» to‘rttala o‘yinda ham g‘alaba qozondi va yana bir e’tiborli jihati, bu o‘yinlarda «Milan» biror marta gol ham ura olmagan edi.  

BARSeLONA – BeTIS (16 sentabr, 23:55)  

O‘tgan mavsumda uzoq vaqt yetakchilar safida bo‘lgan va hatto YeChL yo‘llanmasi uchun ham da’vogar bo‘lgan «Betis» balkim La Ligadagi eng og‘ir taqvimga duch kelganini aytish mumkin. Andaluslar mavsumni «Vilyarreal» maydonida boshlashdi, keyin «Atletiko»ni qabul qilishdi, «Atletik»ka safar bilan uchinchi tur davom etdi. O‘tgan turda «Rayo Valekano»ga qarshi uy o‘yinida 1:0 hisobida g‘alaba qayd etildi. Umuman Bilbaoda 2:0 hisobida yutayotib, g‘alaba qo‘ldan chiqarilganini aytmasa, «Betis» ancha munosib bormoqda. «Barselona» esa yaqin davrdagi so‘nggi qiyin raqib va «Betis»ning og‘ir sinov davri nihoyasiga yetadi. 

«Barselona»ning ham o‘yin borasida o‘ziga yarasha muammolari bor. G‘alabalar u qadar osonlik bilan qo‘lga kiritilmayotganidan ham buni payqash qiyin emas. Ammo o‘yindan o‘yinga ko‘p ko‘rsatkichlar yaxshilanib borayotgani, shuningdek, yangi kelib qo‘shilgan portugaliyalik yulduzlar Kanselu va Felish nihoyat bu turdan asosiy tarkibda tusha boshlashini inobatga olsak, jamoa yanada kuchliroq bo‘lishi lozim. Ammo yo‘qotish ham bor – Ilkay Gundo‘g‘an milliy jamoasi bilan birga Fransiyaga qarshi o‘rtoqlik o‘yinida maydonga tushib, 25-daqiqasida jarohat tufayli almashtirilgandi. Jarohatning qanchalik jiddiy ekani ma’lum emas va futbolchining o‘yinni o‘tkazib yuborish ehtimoli yuqori. Shuningdek, Pedrining ham kamida bir oydan so‘ng to‘liq tiklanishi ma’lum bo‘ldi. 

«Barselona» o‘z maydonidagi so‘nggi 4 o‘yindan uchtasida «Betis»ni yirik hisobda yenggan. Qizig‘i, bu o‘yinlarning ikkitasi bir xil 5:2 hisobida yakunlangandi. Ammo 2021 yil oxiridagi o‘yinda Ximenesning 79-daqiqada urgan yagona goli evaziga mehmonlar 1:0 hisobida g‘alaba qozongandi. 

Ushbu bahsdagi yana bir e’tiborga molik intriga Abdusamad Ezalzulining Barselonaga qaytishi va «Betis»dagi ilk o‘yinini sobiq jamoasiga qarshi o‘tkazishi mumkinligidir. Xavi yosh futbolchini o‘z tarkibida saqlab qolishga har qancha harakat qilmasin, Abde ko‘proq vaqt maydonga tushishni tanladi va andaluslarning taklifini qabul qildi.  

ReAL MADRID – ReAL SOSeDAD (17 sentabr, 23:55)  

Bu safar «Real» nihoyat jiddiy raqibga duch keladi. Madridliklar to‘rt o‘yindan yuz foizlik natija ko‘rsatib turgan bo‘lishsa-da, birinchidan, raqiblar, birinchi turni e’tiborga olmaganda, u qadar jiddiy emasdi. Ikkinchidan, ushbu g‘alabalar ham ancha qiyinchiliklar bilan, so‘nggi ikkitasi oxirgi daqiqalarda, buning ustiga, aksariyat hollarda birgina futbolchining muvaffaqiyatli debyuti hisobiga qo‘lga kiritilganini ham unutmaslik kerak. Ha, Bellinghem Ronaldudan keyin Madriddagi eng yaxshi debyutni o‘tkazmoqda, lekin angliyalik futbolchi amplua jihatidan hujumchi emasligini ham yodga olsak, doim qutqarmasligi mumkin. Zero tur o‘tgan sayin raqiblar Bellinghemga ko‘proq e’tibor qaratishga urinishlari ham tabiiy.

«Real Sosedad» anoyi jamoa emas, bu mavsumda Chempionlar Ligasida qatnashadi. Umuman La Ligada to‘rt turdan keyin hali mag‘lubiyat nimaligini bilmagan to‘rt jamoadan biri bo‘lib turibdi. Ammo shunday bo‘lsa-da, «Sosedad» ancha qiyin raqibligi, ayniqsa himoyada ancha ishonchli o‘yini orqali o‘tgan mavsumda ham ijobiy taassurot qoldirgan. Xususan «Real»ga qarshi o‘yinlar bunga yaqqol isbot – Madriddagi o‘yinda hisob ochilmagan bo‘lsa, Baskoniyada o‘tgan bahsda mezbonlar 2:0 hisobida ishonchli g‘alabaga erishgan. Umuman aynan Madriddagi o‘yinlarni o‘zini olganda ham «Sosedad» munosib qarshilik qila olganligi e’tirofga loyiq. So‘nggi 6 o‘yinda ikki marta durang qayd etilgan va tomonlar 2 martadan g‘olibga aylangan. Agar «Real» ham qachondir ilk ochkosini yo‘qotadigan bo‘lsa, «Sosedad» bu ssenariy uchun ideal nomzod deb bemalol ayta olamiz. 

Jarohatlar borasida «Real»ning asosiy futbolchilari bo‘lmish Militao va Kurtuani umuman mavsum uchun sanoqdan chiqarib tursak bo‘ladi. Vinisius tiklanish jarayonida ammo uning ham safga qaytishi biroz vaqt oladi. Shuningdek, safga yangi qo‘shilgan Arda Guler ham bir oylarda maydonga qaytib qolsa kerak. «Sosedad» tarkibida esa faqat Sodiq Umar jismoniy charchoq tufayli sheriklariga yordam bera olmaydi.  

BOShQA O‘YINLAR  

16 sentabr. Vulverhempton – LIVeRPUL (16:30), YuVeNTUS – LATsIO (18:00), Frayburg – BORUSSIYa D (18:30), TOTTeNHEM – Sheffild (19:00), Vest Hem – MANCheSTeR SITI (19:00), Valensiya – ATLeTIKO (19:15), NYuKASL – Brentford (21:30), Jyenoa – NAPOLI (23:45), PSJ – Nitssa (23:55) 

17 sentabr. Bornmut – CheLSI (18:00), Everton – ARSeNAL (20:30), ROMA – Empoli (23:45).