Ukrainada «Rossiya» so‘zini kichik harf bilan yozishga rasman ruxsat berildi

Ukraina til standartlari milliy komissiyasi «Rossiya» so‘zini va Rossiya Federatsiyasi bilan bog‘liq boshqa tushunchalarni kichik harf bilan yozishga ruxsat berdi.

Rossiyaning keng ko‘lamli bosqinchiligi boshlanganidan beri ko‘plab ukrainalik ommaviy axborot vositalari va ijtimoiy tarmoqlar foydalanuvchilari «Rossiya» so‘zini katta harf bilan yozishni to‘xtatdilar. Endi bu amaliyot ukrain tilining me’yorlariga mos deb tan olindi, ammo faqat «norasmiy matnlarda».

«Ukrinform» agentligining xabar berishicha, endi quyidagi so‘zlarni kichik harflar bilan yozishga rasman ruxsat berilgan: «Rossiya Federatsiyasi», «Rossiya», «Moskva», «Moskoviya», «Moskva qirolligi», «Rossiya imperiyasi», «Rossiya Davlat Dumasi» va boshqalar.

Qaror Ukraina hukumati bosh vaziri o‘rinbosari Irina Vereshchuk tomonidan «Ukraina xalqining Ukraina davlati mustaqilligi uchun olib borgan qahramonona kurashi va ijtimoiy tarmoqlardagi murojaatlarini inobatga olgan holda» qabul qilingan.

8 sentabr kuni Vereshchuk Milliy komissiyani «vaqtni behuda sarflamaslikka va barcha ukrainaliklar qilayotgan ishlarni rasmiylashtirmaslikka» chaqirgan edi.